Çend rêz ji bîranînên min -31-

Weşandina hin not û nivîsên xwe yên kevn didomînim. Min got bira wenda nebin. Ew jî tarîxeke. Do ez çi bû me, çi fikirî me bira were zanîn.

XXX
1986-02-08
Min îro zarok birin hew. Jixwe ra ketin avê, kêf kirin. Hewz nêzî mala me ye. Bi xêra wan ez jî dikevim avê lê ajnê nizanim. Di dera ne kûr da dikim çelpe çelp, lê fêr nebûme, ditirsim.

Rojên tahtîlan swêdî zarokên xwe dibin hew, wan digerînin. Ez jî hewil didim wer bikim, lê xebatên siyasî gelek caran wextê nahêle.

Saet di 17a da civîna Komela Stockholmê hebû, min ji bîr kir, min hew bala xwe dayê saet 19.00 ye.

Min telefonî Koçkakê kir, Nebî Bal bersîv da. Min uzrê xwe xwest. Min got va ye ez têm. Min ban texsiyekê kir, ez çûm Koçkakê. Dema ez gihîştim wir, ew li ser rê bûn, li çûbûnê bûn. Em rûniştin, li ser biryarên girtibûn peyivîn.
Dûra ez, Roman, Firat û Emerê kawacî bi hev ra çûn qahwê.

XXX
1987-02-08

*Mumtaz Armanc anî da min. Ezê sibe bibim çapxanê. Bi xêr ev ji mar jî qediya. 

*Ji mal telefon kirin. Bi diya xwe ra peyivîm.
Nûrî Salmaş jî li mala me bû, ew jî bi min ra peyivî. Got îro em bûkê derdixin, me got em haya te jî bigihîninê.
Birayê min Metîn dizewice.
Nûrî dîsa got ez dixwazim werim wir, li ser îşê min bisekine. Min got baş e. Ma minê çi bigota?
Ev çend car in eynî tiştî dibêje.
Metîn got Tûran Seyfîoglu gotiye bira Zinar hefta pêş me roja şemiyê  telefonî min bike.

XXX
1996-02-08

Lawikê me Serhat hîn nexweş e, îro neçû dibistanê. Ez jî ji ber ku pir bêxew im û nexweş im neçûm kar. Dikuxim û fişke fişka min e.
Ya çêtir Serhat çend rojan li mal be. Bi vê bêtaqetiyê nikane here dibistanê. Dibê çend rojan li mal be, pifa xwe baş bigire heta baş dibe.

Ez nizanim eva astim çawa pê ra çê bû, lawikê feqîr perîşan kiriye. Payizê, zivistanê nigekî min li nexweşxanê ye, nigekî min li malê ye. Ez bûme pisporê astimê. Li ser zarokên bi astimê tuxtor gelek boşor dane min, ez dixwînim. Ez bûme pisporê astimê.

XXX
1999-02-08

*Diyar e di mitînga pêr da min serma girtiye. Ev du roj in halê min tuneye, wer di ta sar da me. Îro neçûm kar.

*Do Qralê Urdinê, Qiral Husên mir. Ji do da ye masmedîa Swêd û ya dunyayê wer qala mirina wî dikin, pirr mezin dikin. Lawê wî yê ji jina wî ya Îngilîz, Abdullah bû kral..
Esas du sê rojan berî mirina xwe, bavê wî prensî ji Hesenê birê xwe girtibû û dabû lawê xwe Abdullah.

*Îro mahkima berpirsiyarên HADEPê bû, ez bawer dikim yek ya du sendîkacî berdan, lê ji berpirsiyarên HADEPê kes bernedan, doza wan avêtin meha adarê. Dibe ku berî hilbijartinan wan berdin, lê kanin bernedin jî, çimkî dawiya HADEPê ewê çawa be hîn baş ne diyar e.

*Di rojnameyeke yûnanî da îro beyaneke Abdullah Ocalan derketiye. Li gor xeberên Telewîzyona Medê, Ocalan di beyana xwe da durûtî û tirsonekiya ewûpiyan rexne kiriye û xwestiye  Koma Miletan wek mesela Kosova dest bavêje mesela kurdan jî û ji bo kurdan jî konferansekê bicivîne.  Daxwazaeke pir baş e, xwezî bikirana. Lê ji bo me tiştekî wiha nakin. Çimkî kes li pişt me tune, Kosowî pişta wan hebû, lema ji bo wan civîn çêkirin.

XXX
2009-02-08

Nazê xanim, min ji vê nivîsa te tiştek fêm nekir. Şivan Perwer kurd e û hemû kasêtên wî bi kurdî ne(belkî di yek du kasêtên wî da stranek ya jî du stranên tirkî hebin). Dema tu dikanî muzîka Şivan şirove bikî maneya xwe ew e ku tu bi kurdî baş dizanî. Yanî ne bi qasî "çawa yî baş î", bi qasî fêmkirin û şirovekirina stranên Şivan tu bi kurdî dizanî. Ê wê demê ev tirkiya te ji bo çi ye?

Tu kurd, Şivan kurd, muzîka xwedêgiravî tu şirove dikiî kurdî û em kesên ku dikin şiroveya te bixwînin kurd.
Lê nivîsa te bi TIRKÎ ye.
Nuha ev ne sosiret û ibret ?
Ez bi xwe tu mane û mentixekî di vê yekê da nabînim.
Heger te şiroveya xwe di malpereke tirkan da û ji bo tirkan ra biweşanda karekî di cîda bû, me yê bigota weleh waye kurdeke me muzîka kurdî bi tirkan jî dide naskirin û bi vê yekî jî ji muzîka kurdî ra xizmetekê dike.

Lê tiştetekî wiha jî tuneye, em kurd xwe bi xwene ne. Û tu radibî dengbêjekî kurd, muzîka kurdî bi zimanê tirkî bi kurdan didî naskirin.

Bi rastî jî hertiştê me ji dinyayê der e. Ez bawer nakim li bêyî kurdekî li cîhanê kes tiştekî wiah bike.
Vê asîmîlasyonê çi felaket aniye serê vî miletî, xwedêgiravê yê herî kurdperwer jî destê wî/wê ji tirkî nabe. Hewqas nebe ku, Şivan Perwer û muzîka wî jî bi tirkî bi me dide nasandin.
Ez çi bibêjim?
Hema Xwedê miletê kurd ji bêtar û feleketên hîn mezin bistirîne!
Amîn... û wesalam...  
Zinarê Xamo