Çend rêz ji bîranînên min -328-

Weşandina hin notên xwe yên rojane û nivîsên xwe yên kevn didomînim. Min got bira wenda nebin. Ew jî tarîxeke. Do ez çi bû me, çi fikirî me bira were zanîn.

XXX
1986-12-22
Îro hewa pir sar bû, li derve ji serma meriv dibû terrik.
Min ji bo Armancê nivîsek hinekî rexnegirî nivîsî. Nivîs li ser kesên ”serbixwe” û bêhêvîtiya wan e.

Hin kes hene tu partiyekê naecibînin, her partiyê rexne dikin, lê ew bi xwe jî karekî berbiçav nakin, riya rast kîjan e nîşan nadin.

Dema meriv bi wan ra dipeyive meriv bêhêvîtiyê di çavên wan dibîne.

Dema karê meriv rast neçe meriv bêhêvî dibe. Lê pir hindik, rast, şaş partî li hemberî dijmin karekî, xebatekê dikin. Çi ji me tê em wê dikin. Lê ew bi karên me ne razî ne.

Mahmûd Kîper ji min ra got, Îbrahîm Guçlu jê ra gotiye wan, Farûk Aras û Mala Gelê Kurd li ser programeke siyasî li hev kirine.

Berê jî Farûk û hevalên xwe di nabêna xwe da hin biryarên siyasî girtibûn, li ser hin tiştan li hev kiribûn.

Ev biryara wan vê carê hêviyekê dide min. Belkî ji bo kesên din jî bibe emsal û daxwaza yekîtiyê, hevkariyê xurttir bike.

XXX
2010-12-22
Ji Mistefa Ozçelîk ra
Mistefa merheba!
Birayê ezîz, ez nizanim ezê werim bîra te ya na. Ez Zinarê Xamo, bi navê xwe yê welêt Vahap Kumruaslan, ji Wêranşarê.
Xiyabî em hevûdu baş nas dikin lê şexsî tesaduf nebû.
Ez bawer dikim cara dawî di sala 1979-an da li Stenbolê li ezexaneya Osman Ozçelîk me hevudu dît. Lê dibe ku şaş bê bîra min.
Her neyse...
Mistefa, ev 30 sal bûn ez nikanîbûm biçûyama welêt, ez îsal havînî çûm, Wêranşarê, Dêrikê û heta bi Wan û Bazîdê, ez li gelek deran geriyam.
Lê wext çênebû ez werim Kurdistana azad jî bibînim.
Ez dixwazim vê buharê di dawiya meha nîsanê da werim wir.
Min bihîst tu li wir î.
Gelo ez werim wir, wext û îmkanên te heye ku tu ji bi min ra bibî alîkar û hinekî min bigerînî?
Herçî tarîx e li gor daxwaza te ye, tu kîjan tarîxê bixwazî ez dikanim di wê tarîxî da bêm.
Li wir gelek dost û nasên min hene, lê meriv nizane li wir bin, ne li wir bin , wextê wan hebe, tunebe û hwd.
Ji ber ku ez caran nehatime wir, loma jî ez dixwazim dostek, hevalek mil bide ber min...
Heger tu bi min ra bibî alîkar ezê gelkî dilşa bibim.
Ez li berndî bersîva te me. 
Min edresa te ji Cemal girt.
Gelek silavên biratiyê
Zinarê Xamo

 XXX
2010-12-26

Merheba Kek Zinar

Min li mailen di spam e de neneribu....nuha min vekir ez li maila te rast hatim....

Di xiyaba te de ez te nas dikim...le bi rasti meseleya ape min u eczeaxane nehat bira min...

Tişteki nuh çenebe,eze li dawiya nisane de li Kurdistane bim.... 
Kengi tu be,sersera ser çavan....hiç meraq neke,wek ku tu li mala xwe be,çi ji deste min be,eze bikim...

beri tu be,heyteyek-dehroja haya min je he be,bes e....

bimine di xweşiye de....
silav....
Mustafa Özçelik...

XXX
2010-12-26

Mistefa, wey mala te ava bira...
Bi vê bersîva te ez pir dilşa bûm...
Welh piştî vê soza te dilê min ket cî, min hinekî rehet kir...
Axir tu zanî ez merivekî klasîk im, heta dewsa nigê xwe saxlem nekim newêrim gava xwe bavêjim....
Bêguman berî hatinê bi çend hefteyan ezê xeberê bidim te.
Mesela ezexaneya apê te Osman jî di dawiya 1979-an(meha 12-an)da dema ku ezê derketama derî welêt, ez çend rojan li mala apê te mam. Li ezexanê berçavik jî çêdikir. Ez ne şaş bim li qatê jor dixebitî, ez dibêm hûn du heb li ba wî bûn, belkî hûn diçûn lîseyê jî.
Lê nayê bîra min ji te, Fadil û Cemal hûn kîjan bûn, ev nayê bîra min. Lê hûn du heb bûn....
Lê nuha tu min bişêlînî jî ez te nas nakim, ji bo ku ez te nas bikim dibê rismekî xwe ji min ra bişînî...:))
Erê ew jî dewranek bû, hat û çû...
Carnan li xerîbiyê bi qalkirina wan rojan em sebra xwe tînin...
Bi silavên biratiyê bimîne di xweşiyê da
 
Telefona min ev:
0046 73 53 44 852
Telefona mal:
0046 8 81 44 82

XXX
2021-12-22 09:06

Ji Fahrî Ordu ra

Merheba birayê ezîz! Te daxwaza hevaltiyê ji min ra şandiye. Gelo tu bi kurdî zanî? 

Çimkî malpera min xurrî bi kurdî ye, ez bi tirkî nanivîsînim. Min li malpera te nêrî, nivîsên te giş bi tirkî ne, min kurdî nedît. Heger tu kurd î, çima tu bi kurdî nanivîsînî?
Bimîne di nava xêr û xweşiyê da.

 

Ji bo ku te bersîv neda min daxwaza te rakir. Li qusûra min nenêre. Careke din bişîne. Nivîsên min xurrî bi kurdî ne, ez qet tirkî nanivîsînim. Wa ye te bi kurdî nivîsîye. Wê demê tu bi kurdî zanî. Hewil bide kurdîya xwe baştir bike. Tu kurmanc î ya zaza yî? Tu ji ku yî?
Gelek silavên biratiyê

Min ev bersîv dayê.

2021-12-23

Mêrik pir qeherîye, bi tirkî bersîveke pir bi hêrs daye min, gotiye tu li derve xwe tiştekî dihesibînî, ez 8 salan bi Kamîl ra di hefsê da mame, filan û bîvan.

Fahrî Ordu, min fêm nekir ji bo çi tu heqasî hêrs bûye û te ev peyvên ne xweş ji min ra kirine? 

Min heqaret li te nekiriye. Min peyveke tahl ji te ra negotiye. Min tu biçûk ”xor” nedîtiye. 

Di her du nivîsên xwe da jî min ji te ra gotiye, ”birayê minê ezîz” û ”gelek silavên biratiyê” . 

Lê diyar e tu ne merivekî layiqî biratiya min î ! 

Min tenê gotiye ez bi tirkî nanivîsim, melpera min xurrî bi kurdî ye. Tu bi kurdî zanî ya na? 

Û heger tu kurd î bi kurdî binivîse. Çimkî di malpera te da bi kurdî tunebû. 

Te xwe ji vê peyva min aciz kiriye û te gotiye, xwedêgiravê ez te biçûk ”xor” dibînim. 

Min ji te ra gotiye ”birayê ezîz, gelek silavên biratiyê”, çawa ez te biçûk dibînim ? 

Dûra jî te dest bi bêedebî û ûqelatiyê kiriye. Efendim te bedel daye, tu ketiye hefsê. Kes ji bo kesî nebûye kurdpwerwer û neketiye hefsê. 

Tu ji bo min neketiye hefsê. Hefsa xwe, ”bedelên” xwe li serê min neke minet, ne xweş e, eyb e. 

Min pirsek ji te kir, min got tu bi kurdî zanî ya na? Heger tu bi kurdî nizanî tu nikanî nivîsên min bixwînî. 

Ev 14 sal in ez di medyaya sosyal da dinivîsim, min rêzek jî bi tirkî nenivîsîye. 

Ev prensîbê min e. 

Tu rast nabînî tu yê nebî hevalê min. Hêrs û minetên te, peyvên te yên çort ji bo çi ye? 

Zinarê Xamo 

2021-12-23 Stockholm