Atmosfera siyasî pir tevlihev û nazik e

Min xurîniya xwe kir, telefona xwe kir sarjê û kompîtora xwe vekir.

Min bi dor bala xwe da malpera xwe ya Facebookê û Twîtterê.
Piraniya parvekirinan minaqaşeyên li ser hilbijartinên 14ê gulanê ne.
Belkî cara pêşî ye di hilbijartinekê da tercîhkirin hewqasî zor e û kurd hewqasî dudil û berbelav in.
Hin kes tiştên ne xweş ji hev ra, ji kesên rayên xwe didin  Kemal Kiliçdaroglu ra dibêjin. Ew jî wan di praktîkê da bi piştgiriya Erdogan sûcdar dikin.

Di dawetnameyeke kurdên rojava da hin şaşiyên rastnivîsê bi ber çavê min ket. Gotinên kurmancî û sentaksa erebî li bin guhên hev xistibûn. Yanî ne kurmancî bû, ne erebî bû.

Min xwest li ser hin minaqaşeyên hilbijartinan û wan şaşiyên zimên ên beloq çend gotinan biêjim, lê min cesaret nekir.
Min ji xwe ra got, serê neêşe paça lê negerîne, serê xwe nexîne terqreqê, tu yê poşman bibî.
Min dev jê berda.
Van rojan minaqaşeyên li ser hilbijartinan pir germ e, ez bi aqara wan minaqaşeyan nakevim.

Di vê hilbijartinê da hevalên Erdogan ne tê da, kurdên din giş bi heq in, para rastiyê, heqiyê di tercîhên gişan da heye. Lema ez tevî minaqaşeyan nabim. Kî raya xwe dide kê serbest e.

XXX

Ev demeke di medyaya sosyal da hin vîdeoyên li ser bertîlxuriya Erdogan tên belavkirin. Di vîdeoyan da li Tirkiyê sîstema talanê, rişwet û bertîêxuryi çawa dixebite, Erdogan vê sîstemê çawa îdare dike tê eşkerekirin. Ev tişt giş tên zanîn, mesele ne tunebûna şahid û belegeyan e, bi hezaran belge û şahid hene.

Însan dipeyivin, vîdeo tên belavkirin lê îreat tuneye, di gotinê da dimîne, kes nikane tiştekî bi efendî bike.

XXX

Heqiyê di destê neheqiyê da barebar e. Heqî bi heq e, rast dibêje. Lê neheqî qebûl nake, dibêje ez rast im.

Tiştê rast dibê meriv karê li zirara xwe neke, fikrê li zirara xwe û miletê xwe neparêze.

Lê însan her tim vê rastiyê nabînin, carnan karê li zirara xwe dikin.