Me îro li Stockholmê kurdperwerê hêja Munzur Çem yad kir

Îro li Stockholmê li Kitêbxaneya Kurdî 40 rojiya kurdperwerê hêja Munzur Çem bi merasimeke bi rêk û pêk, tam layiqî wî hat bibîranîn.

Bîranîn ji alî Gurûba Xebatê ya kovara Vate û Kitêbxaneya Kurdî va hatibû amadekirin.
Gelek nas û dostên wî hatibûn merasima yadkirinê, bi vê minasebetê careke din xatir jê xwestin û ew bi hurmet bibîr anîn.
Mamoste Heyder Diljen bi zazakî û kurmancî pir mikemel moderatoriya merasimê kir.

Xanima Munzûr Çem, Gulîstan Saribaş, Cemîl Gundogan, Selîm Mûrat, Îhsan Espar li ser jiyan û berhemên Munzur Çem peyivîn, jiyana wî, xebatên wî, lêkolîn û kitêbên wî bi beşdaran bi kinî dan nasîn.

Gulîstan xanimê qala disîplîna wî ya xebatê û rojên wî yên dawî kir.

Selîm Mûrat, qala jîyana wî û hin taybetmendîyên wî yên şexsî û kurdistanîtiyê kirin.

Îhsan Espar, jîyana wî ya nivîskarîyê û 27 kitêbên wî bi kurtî dan nasîn, qala naveroka wan kir.

Cemîl Gundogan jî di avakirina nasnameya Dêrsimê ya kurdistanî da li ser rola Munzur Çem sekinî.

Gulîstan xanim bi kurmancî peyivî, hersê hevalên din bi zazakî peyivîn.
Ev cara pêşî ye li Swêd civînek xurrî bi zazakî çêdibe. Ev xêr û çêyî jî bi saya bîranîna Munzur Çemê gorrbehişt bû. 

Yanî bîranîna 40 rojiya wî bû wesîleya karekî baş.
Gorra wî behişt be, bi hurmet bibîr tînim.

Tu nemabû ez neçim merasimê.
Mala Heyder Diljen ava be, heger bi riya WhatsAppê civîn bi bîra min nexista min ji bîr kiribû, ezê neçûma merasimê.

 Xwedê kir Heyder saet û nîvek berê bi tesadufî bi bîra min xist.
Min çer bihîst min bi lez xwe jidand û bazda derve. Şansê min hebû, ez çer gihîştim îstasyonê tirên hat. 

Ez jê daketim tirêna din jî hazir bû, min xwe gîhand wê jî.
Axirê ez 5 deqîqeyan berî saet 13.00a gihîştim kitêbxaneyê.