Çend rêz ji bîranînên min -310-

Weşandina hin notên xwe yên rojane û nivîsên xwe yên kevn didomînim. Min got bira wenda nebin. Ew jî tarîxeke. Do ez çi bû me, çi fikirî me bira were zanîn

XXX
1985-12-02
Îro min ji Umer Acar(Umê)û ji Faîqê me name girtin. Faîq di nameya xwe da dibêje meta min Fatê(Fatê Varol)û xalê min Reşo(Reşo Atilgan)herduyan jî wefat kirine.
Ez li ber mirina herduyan jî ketim. Kesên ez ji wan hez dikim yek bi yek dimrin.
Meta min pir feqîrî dît, pir kişand, bi delaliyê debara xwe dikir, bi peyê xwe apê Mahmet ra dibû pîbar.
Min ji xalê xwe Reşo pir hez dikir, em wek du hevalên pir samîmî bûn. Xalê min bulûrvanekekî pir baş bû. Bulûrvanê dawetan bû.

Min ji diya xwe ra gotibû bira xalê min Reşo ji min ra kaseteke bulûrê tije bike. Diya min got min jê ra gotiye. Lê nuha nexweş e, gotiye hema ez hinekî baş bibim ezê jê ra kasêtekê çêkim. Lê Feleka xayin nehîşt, ew zû ji me stend. Hîn xort bû, bi texmîna min 43-44 salî bû.

XXX
1999-12-2

Êrîşên dewletê ne tenê di warê leşkerî da di warê kulturî da jî wek hertim berdewam e. Bira berdevkên dewletê bi armanca xapandinê ji ewrûpiyan ra bibêjin zimanê kurdî serbest e, lêbelê di praktîkê da dîsa wek xwe dikin, dîsa nahêlin muzîka kurdî bi serbestî bête guhdarîkirin.

Li Diyarbekrê telewîzyoneke mehelî (Kanala TV 21) ji ber ku straneke Şivan Perwer((strana mihemedo)weşandiye ji alî RTUKê (komîsyona radyo û telewîzyonê ya bilind) salekê weşana wê hat sekinandin.

Di biryara RTUKê da tê gotin bi weşandina vê sitranê Kanala 21ê îmkan daye ”propagandeya separatîzmê, terorê û şîdetê.”

Lê hîn wê rojê wezîrê karên derve yê Tirkiyê Îsmaîl Cem kitêbên kurdî da wezîra karên derve ya Swêd Anna Lîndh û got mêze li welatê me tu qedexe li ser kurdî tuneye, tiştê hin kes di heqê me da dibêjin vir e.

Not: Çi heyf min navên kitêban nenivîsîye. Wê demê Mehmet Ûzûn dihat mahkimekirin. Belkî kitêbên wî bin. Anna Lindh mesela Mehmet Ûzûn bi Îsmaîl Cem ra peyivî û jê xwest Ûzûn ji ber tiştên nivîsîne neyê mahkimekirin.

XXX
2000-12-02

Berzan*, ji bo bersîva te ya hinekî dereng gelek sipas.

Te qal nekiriye gelo ji wan xemîşokan te ji Dîcleyê ra xwendin ya na?
Ez dixwazim tu ji wê ra bixwînî. Û bira dûra jî ew ji min ra dîtinên xwe binivîsîne.

Heger bi kurdî nikane tişt nabe, bira bi tirkî binivîsîne. Tirkiya min bi qasî ji nameyên wê fêm bikim hîn maye.
Heger bixwaze ezê jê ra hinekên din jî bişînim.

Wekî din jî her rojên şemiyan di rojnameya Ozgur Politika da jî xemîşokên(çîrokên) min derdikevin. Mesela îro jî di beşê diduyan da xemîşokeke min heye. Navê wê "ker û gur e"

Te gotiye xwendin û nivîsandina te ya kurdî ne baş e. Xwendinê ez nizanim, lê nivîsandina te gelkî baş e. Li gor cara pêşî ye, ez pênc pûanan bi rehetî didim te.

Yanî tu ji sinifê derbas bûyî. Lê ev nayê wê maneyê tu yê êdî hew derza xwe bixebitî. Esas mesele tenê hinekî dîqet e.
 
Dema meriv bixwaze û hinekî jî bala xwe bidê tu sebeb tuneye meriv nikanibe. Çimkî herfên ji elîfba tirkî cihê tenê çar in.
Wekî din giş wek hev in. Ya din jî tu dikanî her roj li metneke kurdî binêrî û paragrafekê ji ber binivîsînî. Ez bawer dikim min ji te ra navnîşana malpera(sîte) xwe şandibû. Heger min neşandibe va ye ez wê û yek diduyên din dîsa dişînim.

Te qala Miherem Şeyhanlioglu  jî nekiriye. Gelo tu çû ser wî ?
Heger tiştek ji te ra gotibe ez dixwazim bizanibim.

Ez gelek silavan li te û li Meyremê dikim û têm herdu çavên Dîcleyê.

Ma înterneta we li malê heye yan jî tu ji dereke din dişînî. Ma Meyrem çima qet tiştekî nabêje?
Ma tu tiştekî ku ew ji min bipirse û bixwaze tunye?

Heger kompîtora te heye ez dikanim klaviya kurdî ji te ra bişînim.

Not:
Gelek silavên min Mihemed Soken bike û bira carê ew jî ji min ra tiştekî binivîsîne.
*Birayê min Mehmet Barzanî Kûmrûaslan.