Çend rêz ji bîranînên min -307-

Weşandina hin notên xwe yên rojane û nivîsên xwe yên kevn didomînim. Min got bira wenda nebin. Ew jî tarîxeke. Do ez çi bû me, çi fikirî me bira were zanîn

XXX
1985-11-29
Îro saet di 22.30î da em 17 heval ji bo rakirina cenazeyê Mistefa Tanguner çûn paytexta Danîmarka Kopenhagenê. Saet di 07.00ê sibê da em gihîştin wir. Saet di 14.30î da em li dêrekê civiyan. Bi texmîna min li dora 200 kesî di merasimê da hebûn.

Axaftina pêşî wek serokê partiyê Mûrad Ciwan kir. Dûra du mamosteyên Mistefa û berpirsekî Partiya Komunîst a Îraqê peyivîn. Axaftinên herdu mamosteyên Mistefa(danîmarkî bûn)pir dilşewat bûn, ez girîyam. Pir pesnê Mistefa dan, pir jê hez dikirin. Axaftina berpirsê Partiya Komunîst a Îraqê jî baş bû.

Ji partî û hêzên kurd jî gelek mesajên sersaxiyê hatibûn. Merasim baş û bi disîplîn derbas bû. Her kes bêdeng û xemgîn bû. Apociyan hevalekî me yê wek şêrekî kuştibûn. Ya xerab wek partî me heyfgirtin jî rast nedidît, lema jî ew ji me dikujin û ji wan ra dimîne…

Êvarî ez, Şêxmûs Cibran, Mahmûd Kîper, Malmîsanij û Seîdê Cizîrî em çûn mala Behzat Baskin xoce. Min ji milet ra tawe çêkir, me şîva xwe xwar.
saet di 22.30î da em ji Kopenhagenê bi rêketin. Roja yekşemiyê saet di 07.00a da gihîştin Stockholmê.

XXX
1986-11-29
Îro kongreya komeleya Spangayê çêbû. Malmîsanij, Mamoste Nûjen, Bawer Eser, Ahmed û Mihemed Bekir bûn nûnerên Federasyonê.
Alî Çîftçî, Sidîq Bozarslan û Şukru xoceyê licî jî ji bo nûnertiya Federasyonê bûbûn namzed, lê qezenc nekirin. Vê têkçûnê Tevgera Sosyalîst şeqizand, wan netîceyeke wiha nedipa.

XXX
1992-11-29
Astima lawkê me Serhat lê giran bû. Bi şev me revîrevî bir nexweşxana Sachsska ya zarokan. Derman danê û girtin bin kontrolê. Payizê û zivistanê astima wî lê giran dibe. Diya wî li ba wî ma, ez vegerîyam malê.
Tuxtor dibêjin astima zarokan bi piranî dûra derbas dibe. Sporê tewsîye dikin. Hêvî dikim ji vê belayê xelas bibe.

XXX
1999-11-29

Min îro çîrokek din ji Ozgur Polîtîkayê ra şand. Çîroka pêşî di hejmara 27ê mehê da weşandin.Rismekî îdare jê ra çêkiribûn. Rismekî ne li gorî dilê min bû.Dibê rismekî xweşiktir çêirana lê zêde guh nedanê.
Min digot qey ewê wek zêdayiyekê, wek kovareka cihê derxînin, lê ne wisa ye, rûpelek danê.