Hilbijartin

BDP-ê îro berendamên xwe yên parlamentoyê yên serbixwe eşkre kirin.

Min hêvî dikir û pir dixwest ku HAKPAR jî di vê tifaqa netewî da hebûya.

Lê pir mixabin wa ye tuneye.

Em ji nivîsa birêz Îbrahîm Kureken ya di Kurdînfoyê da fêr dibin ku berpirsiyarên BDP-ê û yên HAKPAR-ê li hev nekirine.

Xwezî li hev kiribûna, xwezî HAKPAR jî di vê palatforma kurd ya netewî da hebûya.

Lê hêviya me têr nake, dibê siyasetmedarên me li hev bikin, li gor hin şert û momentan dîrokî biryarên rast bigrin.

Bi baweriya min ne ez tenê, piraniya kurdan û şertên civata kurd ya îro jî hevkarî û tifaqeke netewî li ser kurdan û hêzên siyasî ferz dike.

Bêguman em bi temamî nizanin ku berpirsiayrên HAKPAR-ê û BDP-ê ji bo çi li hev nekirine û di vê lihevnekirinê da kî bi heq û kî neheq e.

Ji berpirsiyarên HAKPAR-ê Îbrahîm Kureken di nivîsa xwe da qala hin tiştan kiriye, lê ez naxwazim li ser wan îdîayan tiştekî bibêjim.

Û ji xwe gotina min jî ne rast e, ji ber ku em meselê baş nizanin.

Lê li gel vê jî bi dîtina min ew tiştên ku wî qalkirine ne gelşên pir mezin in û dibê bi hawakî bihata çareserkirin.

Bi baweriya min heger ew îdîayên birêz Kureken hemû rast bin jî û bi rastî jî BDP li ser HAKPAR-ê hinekî neheq be jî dibê HAKPAR-ê him ev neheqiya BDP-ê ji bîrrûraya kurd ra bigota û him jî di vê hilbjartinê da ji vê platforma netewî venekişiya.

Em ferz bikin ku BDP-ê di bin ra nexwestiye ku ji HAKPAR-ê kes were hilbijartin û loma jî ciyên ku ewê lê neyên hilbijartin pêşkêşî wan kir.

Ê ji xwe dema HAKPAR bi serê xwe jî têkeve hilbijartinan ewê nikanibe li tu derê parlamenterkî derxe.

Yanî ji tifaqê vekişîn û bi serê xwe ketina hilbijartinan ji HAKPAR-ê ra ne baştir û ne li karê ye û derxistina çend parlamenteran jî bi xwe ra nayne.

Wê demê vekişîna ji tifaqê pir bêmaneye.

Helbet mafê HAKPAR-ê ye ku weke partî têkeve hilbijartinên 12-ê îlonê.

Lê siyaset dibê li gorî şert û mercên civatê were kirin. Bi dîtina min şertên welatê me yê îro li hemberî AKP-ê û dewletê hevkarî û tifaqeke netewî li ser me ferz dike.

Di hilbijartinên 12-ê îlonê da bi beşdariya eniyeke kurd, kurdên li karê û bi beşdariya perçe perçe jî kurdê li zirarê bin.

Nimûneya kurdistana başûr li ber çava ye. Kurdan bi hevkarî û tifaqê tim qezenc kirine û bi belovaciyê wê jî tim li zirarê derketine.

Di vê tifaqa hilbijartina 12-ê îlonê da hebûna KADEP-ê û ji hêzên îslamî jî hebûna Altan Tan tiştekî pir baş e û biryareke di cî da ye. Kurdê ji vê tifaqê li karê derkevin.

Ji bo kurd li hemberî dewleta tirk biserkevin dibê destên xwe bidin hev û hevkariya xwe xurt bikin. Dibê HAKPAR teng nefirkire.

Riya serketinê ji tifaqê derbas dibe…