Di konferansa ”avakirina aşitiyê” da Leyla Zana debarê çareseriye mesela kurd û referandûmê da gotiye:
”Pêşniyara birêz Îshak Alaton ya ji bo raferandomê kir, dibê ne tenê li rojhilata başûr be, dibê li temamê Tirkiyê bê kirin. Gelo miletê tirk dixwaze bi miletê kurd ra bijî y ana?.”
Siyasetmedarên me carnan tiştên dûrî aqilan û sedîsed li dijî berjewendiyên miletê xwe dibêjin.
Îshak Alatonê cihû, gotiye, ji bo ku meriv bizanibe kurd dixwazin bi tirkan ra bijîn ya na, dibê li Kurdistanê referandûmek were çêkirin.
Li gorî baweriya wî, piraniya kurdan ewê li dijî veqetandinêbin û bixwazin bi Tirkiyê ra bijîn.
Loma jî dibê Tirkiye ji gaveke wiha netirse.
Lê Leyla Zana xanim ji dêlî ku piştgiriyê bide vê pêşniyra Alaton, gotiye, ev referandûm dibê ne li Kurdistanê tenê, dibê li seranserê Tirkiyê were kirin, hela ka Tirk jî dixwazin bi kurdan ra bijîn ya na?
Meriv fêm nake siyasetmedareke kurd çawa dikane referandûma li ser qedera miletekî bindest ji miletekî serdest jî bixwaze?
Dewleta tirk û tirkan welatê me îşxal kirine û naxwazin em ji wan veqetin.
Îcar ji bo çi emê rabin di referandûmeke ji bo veqetandinê da biryara ji wan jî bipirsin û raya wan jî bigrin?
Raya miletê tirk diyar e, ew naxwazin em ji Tirkiyê veqetin û Kurdistaneke serbixwe ava bikin.
Û dema di referandûmeke derbarê mafê çarenûsa me da tirk jî bibin xwedî gotin, hemû kurd jî veqetandinê bixwazin, emê dîsa wenda bikin. Çimkî ew di piraniyê da ne.
Loma jî heger rojekê li ser veqetandina ji Tirkiyê referandûm were çêkirin, dibê ev referandûm tenê li Kurdistanê û di nava kurdan da were çêkirin.
Heger di vî warî da tirk jî bibin xwedî ray, emê wenda bikin.
Ji ber vê yekê jî li hemberî vê dîtina Leyla Zanayê ez matmayî mam.
Referandûma Alaton qal kiriye, ne ji bo fêmkirina hestên kurdan û tirkan yên derbarê hev da ye, gelo tirk û kurd di heqê hev da çi difikirin?
Referandûma Alaton qal kiriye, ku di vî warî da numûneya Qanadayê jî daye, ji bo mayin û veqetandina kurdan ya ji Tirkiyê ye.
Li gor baweriya Alaton, kurdên veqetandinê dixwazin di hindikayê da ne û loma jî dibê Tirkiye ji van kesan netirse, van dîtinan qedexe neke û zorê bikar neyne.
Ji dêlî qedexe û zorê, dibê Tirkiye li Kurdistanê di nava kurdan da referandûmekê çêke û piştgiriya piraniyê bigre û kesên xwediyê dîtina veqetandinê di warê huqûqî da pûç bike.
Yanî dema Alaton dibêje referandûm, ew bawer dike ku piraniya kurdan li dijî veqetandinê û Kurdistaneke serbixwe ne loma vê dîtinê pêşniyarî Tirkiyê dike, ji Tirkiyê ra dibêje netirse.
Bi dîtina min sibe Tirkiye bibêje were em herin referandûmê dibê meriv qebûl neke, demê bixwaze. Ji ber ku wan bi milyonan mahcir anîne li Kurdistanê bicî kirine û ev 90 sal in ku li hemberî kurdan siyaseteke asîmîlasîyonîst dimeşêne. Dewletê, bi vê siyseta xwe ya nîjadperest bi sedhezaran kurd ji kurdayetiyê dûr xistine, kirine hevalên xwe.
Û di rewşeke wiha da bibêjin werin em herin referandûmê. Ne hewceyî referandûmê ye, em mafên xwe yên netewî dixwazin, em dixwazin li welatê xwe bibin xwedî desthilat. Ji bo vê yekê referandûm ne hewce ye.
Ma ew li seranserê Qibrisê referandûmê diparêzin, dibêjin ka em ji gel bipirsin hela dixwazin veqetina y ana?
Bêguman tiştekî wiha qebûl nakin.
De îcar çima emê qebûl bikin?
Lê tiştê xerab, ne tirk siyasetmedara me ev yek xwestiye.
Mixabin, piraniya siyasetmedarên me ne jîr û xwedî tecrûbe ne, gelek caran tiştên li zirara miletê xwe dibêjin û dikin.
Inga kommentarer:
Skicka en kommentar