Ji hesinê xerab şûrê baş çênabe

Li gor xebera rojnameya Yeni Şafakê û gelek rojname û malperên din hefta borî TRT-ê ji bo Guler Işika ku ewê di TRT Şeşê da di dewsa Rojînê da programan çêke festeke nasandinê çêkirye.
Di vê festa nasindinê da Guler Işika me li ser programa xwe jî peyivîye û bombeya xwe ya pêşî teqandiye, xanima me ya ”esilkurd”gotiye:
”Ez dengbêjeka tirk a esilkurd im. Di vê kanala ku ji bo perwerdeya hemwelatiyên min yên kurd hatiye avakirin da çi ji destê min were ezê bi rengekî herî baş bikim. Ez şiklekî Seda Sayana kurda me.”
Çepik, çepik!!!
Li hember gotinên wiha hêja û giranbuha(!) dibê meriv li çepikan xe û heta jê ra hinekî jî bilîrîne.
Guler Işik xanimê hîn dest bi wezîfeya xe nekiriye nîşan dide ku ew ji berê "kedî" û "terbiye" bûye û dersa xwe baş xebitiye.
Guler xanim ji nuha da bi kurdan ra weke siyasetmedareka tirk dipeyive û wisa xîtabî wan dike, dibêje di vê kanala ku ji bo perwerdeya hemwelatiyên wê yên kurd hatiye avakirin ewê xizmete baş bide kurdan.
Xanim zimanekî pir “dîplomatîk” yanî zimanekî ku tam tirk dixwazin bikar aniye. Xwe nake kurd û dengbêja kurd, weke hemû “kurdên dewletê”, ew jî dibêje, “ew dengbêjeke tirk a esîlkurd e”.Gotina “esilkurd im” tê maneya ez xwe kurd hesab nakim, lê ji ber ku dê û bavê min kurd in ez vê “esilkurdiyê” pêva dikim.
Dewlet tam li kurdên wiha digere, kurdên ku bi dil û can û serbilindî nebêjin em kurd in, bibêjin ez bi eslê xwe kurd im lê...
Pêvekirina “esil” pir ne girîng e, li Tirkiyê herkes “esilçerkez, esilgurcî, esilarnawit, esilboşnak” û esil nizanim çi ye.
Dewlet ji gotina "esil" pir zêde ne aciz e. Ya girîng dibê meriv nebêje ez KURD IM.
Û wa ye Guler Işik xanimê jî ji nuha da gotiye ew tenê “dengbêjeke tirk ya esilkurd”e.
Yanî ne kurd e û ne jî dengbêjeke kurd e.
Piştî darbeya 1980-î sendîqaciyekî hevalê TKP hebû, navê wî Ekrem bû. Paşnavê wî min ji bîr kiriye, kurd bû lê xwe tirk qebûl dikir û camêr weke tirkekî jî mir.
Carê di sohbeteke me da vî Ekremê TKP-yî bi tirkî ji min ra got, “bîzîm peder de kurt tu”, yanî bavê min jî kurd bû.
Lê ew ne kurd bû, tenê bavê wî kurd bû.
Guler Işik xanim jî weke vî Ekremê TKP(Partiya Pomînîst) dibêje ew yeka "esilkurd e".
Heyran hema ew "esilê" te jî ji me ra nelazim e, hema ji kerema xwe ra bi tevayî bibe tirk çêtir e.
Ez mame heyirî, her ku ez kurdên wiha şexsiyet zeîf dibînim ku newêrin eslê xwe rast bibêjin, ez merezarî dibim.
Min hîn programa Guler Işika ”dengbêja tirka esilkurd” temaşe nekiriye. Lê îro bi van gotinên wê dilê min jê geriya.
Însanê ku newêribe eslê xwe eşkere bibêje tişt jê dernakeve, heta nikane bibe hunermendekî/hunermendeka baş jî.
Lê li gel vê jî ez hêvî dikim ku ev gotinên wê ne bi hesab û kitab bin, ji ber nezaniya wê, tenê wer hatibe ber devê wê û wê jî wisa gotibe.
Bes tiştê ez dizanim ji hesinê xerab şûrê baş çênabe, lê mimkûn e ku mûcîze jî hebin...