Li gor xebera Ajansa Nûçeyan a Firatê,(ANF) jinên kurd yên li bajarê Dortmundê ji bo ku porê ”Rêberê Gelê Kurd Abdullah Ocalan” bi darê zorê hatiye kurkirin protesto bikin, wan jî qefle bi qefle serên xwe dane ber makîne û gûzanan yanî porê xwe kurkirine.
Ev tevgera ”protestoya” dûrî aqilan ji bal Meclîsa Jinan ya Dortmundê va hatiye organîzekirin.
Tê gotin ku gelek jinên kurd li kolana Dortmundê ya herî qelebalix, li ber dêra Reinoldî Kircheyê kom bûne û yek bi yek porên xwe kur kirine.
Û vê yekê jî tu bixwazî nexwazî gelkî bala almanan kişandiye, li hember vê ”protestoya” nedîtî herkes matmayî maye.
Wek tê zanîn çendakî berê hin abûqatên Ocalan şaiyak derxistin, gotin serê Ocalan bi zor li makînê xistine yanî porê wî kurkirine.
Li ser belavbûna vê îdîayê, hinekan biryar dan û gotin divê kurd jî porê xwe kurbikin.
Esas dû ra hat gotin ku ev îdîa ne rast e, kurkirin li ser daxwaza Ocalan bi xwe bûye, lê pere nekir.
Ji roja şaiya kurkirina ”porê Ocalan” belav bûye û vir da ye li Kurdistanê û li dervayî welêt bi sedan, belkî jî bi hezaran jin û mêrên kurd pê ketine porê xwe kur dikin.
Xwedêgiravî vê yekê jî li hember zordariya dewletê wek protestoyekê dikin.
Kî çi protesto dike bira bike, ez ne li dij im ku hin kes ji bo Ocalan hin çalakiyan li dar dixin. Lê ne bi vî rengî, ne bi vê sosirtetê.
Wek her miletî, hin urf û adet û hin normên kurdan jî hene. Kurd li gor van urf û adetan, li gor van normên exlaqî û kulturî tevdigerin û li hember bûyeran hin reaqsiyonan nîşan didin.
Mesela meriv di şînê da nakene.
Dema jin têkeve nabêna şer û kitana serê xwe bavîje ortê meriv şer radiwestîne û ji bo vê nabêncîtiyê li jinê naxe.
”Porkurkirina jinan” li ba kurdan wek adet heye, lê di hin haletan da tê kurkirin.
Dema xortekî malê, bav û bira ya jî yekî pir hêja bimre, jin guliyekî xwe ya jî herdu guliyên xwe jêdike.
Lê porê xwe kurr nake.
Porkurkirin nîşana QEBHETÊ ye.
Dema keçekê di mala bavê xwe da xwe avis bikira wek qebhet porê wê kur dikirn. Ji bo ku ji ber wê qebheta xwe fedî bike, nikanibe li ruyê kesî binêre.
Yanî bi gotineke din, porkurkirin, nîşana sûc û qebheteke pir mezin e. Ne nîşana protestoya zulma li ser seokekî ye.
De îcar ez fêm nakim, ev kesên ku porê keç û jinên kurd yên fedekar û dilsoz didin kurkirin ji bo kîjan qebheta wan vê yekê bi wan didin kirin?
Ma kesên porê wan tên kurkirin namûsa xwe bi dijmin ra pîs kirine, navekî xerab anîne ser xwe ya jî li hember PKK-ê û Ocalan sûc û qebhetek mezin kirine ku porê wan didin kurkirin?
Porê Ocalan kur kirine!
Ê qey dewlet li hundur çi bîne serê Ocalan, PKK û berdevkên wî jî li der ewê eynî tiştî bînin serê vî miletê belengaz?
Dewlet sibe dikane simêla wî jî kur bike.
Qey hemû mêrên kurd bi navê ”protestoyê” ewê rabin simêlên xwe kur bikin?
Ya jî wek Laleş Qaso gotiye, xwedêneke dewlet sibe dikane ”bilikê” Ocalan jî jêke.
Qey hemû endam û dilsozên PKK-ê û DTP-ê jî ewê rabin ”bilikên” xwe jêkin?
Tirk zalim û gelkî bêbav in, heger bizanibin ew çi bînin serê Ocalan, PKK jî li der ewê eynî tiştî bîne serê kurdan, bi rastî ji bo ku kurdan bêzuriyet bihêlin dikanin tiştekî wiha bikin.
Loma jî ”protestoyên” wiha pir tehlûke ne û riyên xerab bi ber tirkan dixînin.
Heger ji we tê, herin por û simêla kesên ku hevalbendî û ajantiya dewleta tirk dikin kur bikin, kesên ku welatê xwe pêşkêşî dijmin dikin, kesên ku guleyan bera zarokên xwe didin, kesên xiyanetê bi qewmê xwe ra dikin…
Wan cezayekî wiha heq kirye.
Siyasetmedar û rewşenbîrên miletekî kultur, normên exlaqî, urf û adetên miletê xwe bi vî rengî dejenere nake.
Siyasetmedar û rewşenbîrên miletekî li însanên xwe zulmeke wiha nake.
Ev, ne protesto û têkoşîna li dijî dijmin e, bêexlaqiyeke bêmane û xav e. Şerm e, bes e vê zulmê û neheqiyê li mêr û jinên kurd yên dilsoz û fedekar bikin.
Inga kommentarer:
Skicka en kommentar