Di rakirina Heykelê Selahedînê Eyûbî yê li Şamê kane tilîya tirkan hebe

Rî dibe bihost, dijmin tu carî nabe dost. Ji tarîxa xwe em vê rastî baş zanin. Bi bawerîya min kane tilîya tirkan di rakirina heykelê Selahedînê Eyûbî el kurdî da hebe.

Erebên çete, neyarên miletê kurd heykelê Selahedînê Eyûbî ji ber Kela Şamê rakirine. Her roj dîtina heykelê serokekî kurd bi erebên îslamî pir zor hatiye, çimkî ew heykel mezinahîya kurdan tîne bîra wan.
Li paytexta wan hebûna heykelê kurdekî wan diêşîne.
Gotine me ji bo tamîrkirinê rakiriye, piştî temam bû, emê deynin ciyekî din.

Gotina cîyekî din pir bi maneye, tê wê maneyê heger deynin jî ewê bibin dereke xalî, dereke zêde rê vênakeve, kes nabîne. Cîyê heykel yê nuha dereke merkezî ye, rojê bi hezaran însan dibîne. Lê belkî jî vira dikin, ewê daneynin tu derê. Ez di wê bawerîyê da me. Ji bo paqijkirinê ne hewceyî rakirinê bû.

Bi ereban pir zor tê kurdekî ew ji bindestîyê rizgar kirin, Quds ji Xaçparêzan girt, da wan. Nuha jî heykelê wî radikin.

Ereb şerm dikin ji nav wan mêrekî wek Selahedînê Eyûbî derneket, ev yek di dilê wan da bûye birîneke bêderman.
Lê dibe ku tiliya tirkan jî di vê da hebe. 

Çimkî tirkan gelek heykelên kurdan, sîmbolên wan rakirin. Tirk tehamulî tiştên wiha nakin. 

Tirk naxwazin eserekî, navekî, heykelekî kurdan bîne bîra însanan hebe. 

Ji bo wê jî ciyên gorrên kurdên îdamkirine jî nabêjin, hestiyên wan nadin kurdan, ji bo ku gorrên wan tunebin û kurd neçin ser.
Di navbera salên 2016-2022ya da, piştî tayînkirina qeyûman hemû heykel, abîde û bustên serok, rewşenbîr û sembolên kurdan gişk rakirin, rûxandin.

-Heykelê Ehmedê Xanî, li Bazîdê di hezîrana 2017a da ji aliyê qeyûm ve hate rûxandin. 

-Peykerê Cegerxwîn, li Batmanê, li parka ”Kî ne Em” di hezîrana sala 2022a da ji aliyê qeyûmê beledîyê ve hate rakirin.

-Peykerê Orhan Doğan, li Cizîrê ji aliyê qeyûm ve hate rakirin.

-Peykerê Uğur Kaymazê 12 salî, bi 13 guleyan hatibû kuştin, li navçeya Qoserê di hezîrana sala 2017a da ji aliyê qeyûm ve hate rakirin

-Abîdeya Roboskî, li Amedê li Parka Kayapinarê ji bo bîranîna 34 kesên di komkujiya Roboskî da hatibûn kuştin, di meha 12a ya sala 2017a da ji aliyê qeyûm ve hate rakirin.

Miheqeq hinên din jî hene. Ji bo wê jî ez dibêjim di rakirina heykelê Selahdenînê Eyûbî da jî kane tiliya tirkan hebe, wan zext dabe ser çeteyên xwe, gotibin vî heykelê Selahedînê Eyûbî yê bi heybet rakin.

XXX

Li Sûriyê bi hezaran ereb li Hesekê û li hin derên din, bi rismên Seddam Husên daketine kolanan û kurdan bi qetlîamê tehdît dikin. Hêzên hukûmetê, entegrasyoncîyên me bêdeng in, li gefên ereban temaşe dikin. Kurd newêrin ji malên xwe derkevin.
Dawîya entegrasyînê, yanî berhema teslîmîyetê ev e. Dema kurd ne desthilat bin, bêsîleh bin ereb ewê wiha bikin. Rewş pir krîtîk e, dibê entegrasyoncî midaxele bikin.