Ev çi dil e nabije zimanê dayika xwe?

Hin edîb hene kurmanciya wan pir baş e, lê tu dibêjî belkî sond xwarine di jiyana xwe da ewê peyvekê jî bi kurmancî nenivîsînin.

Ez bi dil û can dixwazim rojekê çend gotinên wan ên kurmancî bixwînim. Lê wek tobe kiribin peyvekê jî bi kurmancî nanivîsînin.
Malneketno, rojekê hûn du gotinan bi kurmancî binivîsînîn ma kevirê bibare, qey şohreta we yê pê lekedar bibe?
Ev çi dil e nabije zimanê dayika xwe, zimanê zaroktiya xwe?

XXX

Bira bala we tenê ne li ser şaşiyên kesên dibe, tenê bi kêmasî û şaşiyên kesên din serê xwe neêşînin, xwe neqeherînin.

Hûn karê baş bikin, tiştê baş û xweş bibêjin. Bira xelk tiştê baş û xweş jî bibihîze. Zimanê şîrîn mêhr ji qulikê derdixîne.

XXX

Hewcedariya me ne bi mehareta dilhîştinê, bi zerafeta dilgirtinê, bi xweşgotinê, bi maqûlî û kibariyê heye. Di minaqaşeyên siyasî da bînfirehî tim ji hêrsokiyê baştir û bi fêdetir e.

Bi qasî tu çi dibêjî, tu çawa dibêje jî muhîm e.

XXX

Nêzî 60 sal e di nav micadela siyasî da me. Ji bo ku Kurdistaneke azad bibînim li gorî zanîna xwe, qeweta xwe, îmkanên xwe di vê riyê tiştê ji min hatiye min kiriye. Lê çi bikim min hîn jî Kurdistana serbixwe nedîtiye.

Ez karê xwe dikim, heta ji min tê bêhêvîtiyê ji xwe dûr dixînim, Kurdistana serbixwe zû çêdibe, dereng çêdibe ne sûcê min e.