Min Hindik-Rindik ji bo xatirê we nuh kir

Gelî xwendevanên ezîz, dost û heval û blogerên kurd yên xoşewîst, merheba, silevek germ li hemûyan!

Ez dixwazim îşev mizgîniyeke xweş û xebereke xêrê bidim we.

Ne bi qasî min be jî, lê ez bawer dikim hûnê jî bi vê mizgîniya min kêfxweş bibin.

Wek hûn jî zanin "hindik-rinkdik" 10 salên xwe qedand û ket sala 11a. Lema min biryar da ez şikil û şemalekî nuh bidim bloga xwe, yanî "hindik-rindik" hinekî din jî rind bikim.

Ji bo ku hûn kanibin rehettir bixwînin û nivîsên hûn lê digerin hêsantir bibînin.

Ev du sê roj in xortekî jîr û jêhatî, di her tiliyeke wî da marîfeteke heye, ji vê bêxwedîya înternetê û blogan û van îcadên nuh hemûyan pir baş fêm dike, bloga min nuh dike...

Hîn nuh dest pê kiriye, hêdî hêdî, yanî wek soran dibêjin wirde wirde li ser mîzanpaja wê dixebite.

Ewê çend rojan bajo ez nizanim. Lê li gora texmîna wî heta mehekê ewê bi temamî biqede.

Ez ne tenê dîsayneke nuh didim "hindik-rindik", ez naveroka wê jî ji hev digrim, li gorî mijaran kategorîze dikim.

Wek hûn jî zanin berê hemû nivîsên min, yên li ser zimên, çîrok, pêkenîn, şiîr, rexne û hwd, hemû tevlihev bûn. Lê nuha ez wan li gorî mijaran di bin sernivîsên cihê da ji hev cihê dikim.

Bi vî rengî xwendevan nivîsa lê digere kane bi rehetî bibîne. Yanî nivîs li gorî mijaran ewê ji hev cihê bin. Ev yek karê xwendevan rehet dike.

Ji ber nivîs pir in, ji sala 2007a û vir da ye min 4000 hezar nivîs weşandine. Lema jî ji hev girtina(tasnîfkirina)hewqas nivîs ewê wextê bigre. Lê dema biqede ewê pir xweş bibe. Hêvî dikim bi dilê we be jî.

Ji nuha da mîzanpaja hindik-rindik ji kok da hatiye guhertin, min ew logoya berê ji bin da guhert.

Berê hinekî qelebalix bû. Nuha sadetir bûye. Lê helbet hîn prov e, ne şiklê dawî ye, di rojên pêş da ewê şiklê dawî bigre.

Lê dîsa jî guhertineke esasî çê bûye û bi ya min xweşiktir xuya dike. Hêvî dikim hûn jî ji vê dîzayn û mîzanpaja nuh hez bikin.

Ya din heger dîtin û pêşniyara we hebe, hûn jî kanin fikir û pêşniyarên xwe di binê blogê da binivîsin. Ezê fikir û pêşniyarên we bigihînim hosteyê xwe.

Berê min bêparagraf û bi fontên biçûk dinivîsî. Hoste ji min ra got ev yek xwendinê zahmet dike. Lema jî ji nuha û pê da ezê bi nabên û bi fontên mezin binivîsim. Bi rastî jî xwendin hêsantir dike.

Ya din heta nuha min tu carî bi nivîsê ra risim belav nekiriye. Ji nuha û pê da heta ji min were ezê bi nivîsan ra risman jî belav bikim. Min îşev bi alîkariya lawikê xwe Rojen dest pê kir. Ez hêvî dikim ezê bikanibim fêr bibim...

Tiştê ez nuha li ser guherînê bibêjim ev in.

Heta agahiyeke din bi xatirê we