Dibê DTP hesab ji Salahattîn Demîrtaş bipirse

Di dawiya nivîsa xwe ya do da min gotibû ku ezê sibe(yanî îro) li ser beyana parlamenterê DTP-ê yê Diyarbekrê Salahattîn Demîrtaş rawestim.
Demîrtaş, di beyana xwe ya di malpera ”Bîanetê” da(27/2-09) da ji Tolga Korkut ra gotiye*,”Em taleb nakin ku kurdî bibe zimanê duyem yê resmî, jixwe ji bo Tirkiyê ne tiştekî rast e.”Bêguman ev tiştekî pir cidî ye û cara pêşî ye ku berpirsiyarekî DTP-ê hewqasvekirî dibêje ”em doza resmîbûna zimanê kurdî nakin.
Heger doza viya jî nakin wê demê doza çi dikin?
Demîrtaş li ser axaftina Ahmet Turk ya bi kurdî ya di grûba meclîsê da ji Bîanetê ra wiha gotiye:
”Em taleb nakin ku kurdî bibe zimanê duyem yê resmî, jixwe ji bo Tirkiyê tiştekî ne realîste jî. Weke Iraqê em daxwaza du zimanên resmî nakin. Di îdareya merkezî da zimanê resmî tirkî ye. Di îdareyên mehelî da dibê zimanên din jî werin bikarnîn. Li gor hewecedariyê, dikane stuktureke azad be, selahiyetên îdareyên mehelî dikane were zêdekirin. Di hin îdareyên mehelî da zimanê duyem dikane bi kurdî be. Ev jî ne li seranserê Tirkiyê, li derên hewecedarî lê hebe.” (Axaftina Salahattin Demirtas, Bianet 27/09)Li gor van gotinên Demîrtaş, DTP naxwaze zimanê kurdî li Tirkiyê di her qedemeya dewletê da bibe zimanekî resmî û yê perwerdeya giştî.
Tiştê ew dibêje, dema li hin deran, hin kes bixwazin û ew jî di çarçeweya û selahiyeta îdareyên mehelî da dibê destûr were dayin.
Yanî tiştekî weke qursên kurdî. Lê jixwe nuha jî ev destûr heye, kesê bixwaze dikane qurseke kurdî veke.
Ev dîtinên Salahattîn Demîrtaş pir xeter û tahlûke ne, dîtinên dewletê û kemalîstan yên di nava kurdan da ne.
Demirtas dibêje ”tu talebeke me ya resmîbûna zimanê kurdî tuneye” lê hevalên wî heta nuha bi sedan caran eksê vê gotine, xwedêgiravî tim ji dewletê doza naskirina nasnameya kurdî û perewerdeya bi zimanê kurdî kirine.
Wê demê tiştên heta nuha hatine gotin hemû vir û ji bo xapandinê bûne.
Ê heger daxwazeke DTP-ê ya resmîbûna zimanê kurdî tuneye, wê demê çima di pêsengiya komela TZP-Kurdî ”Trvgera Ziman û Perwerdehiya bi kurdî”da ji bo resmîbûna zimanê kurdî li vir û li wir meş û mitîngan çêdikin, bandrol û panakartên ”em perwerdeya bi zimanê xwe dixwazin, bira kurdî bibe zimanê fermî, zimanê me rûmeta me ye” didin destê jin û zarokên kurd û li kolanan van sloganan bi wan didin qîrandin?
Heger gotinên Salahattîn Demîrtas rast bin, wê demê ”Tevgera Ziman û Perewerdeya bi Kurdî”, tevgereke ji bo xapandina gel e.
Heger DTP naxwaze zimanê kurdî bibe zimanê duyem yê resmî, wê demê daxwazên Dayikên Aştiyê jî hemû derewe in.
Hîn wê rojê ji Dayikên Aştiyê Nafîye Yîgît, ji berpirsiyarên dewletê ra digot, ”astengiyên li pêşiya kurdî rakin û kurdî bikin zimanê fermî.”Wê demê ev gotin jî ji bo xapandinê ne.
Bêguman meriv dikane ji beyanên PKK-ê, DTP-ê û rêxistinên nêz û gêrêdayî wan bi sedan, bi hezaran nimûneyên daxwaza resmîbûna zimanê kurdî bibîne û li vir pêşkêş bike.
Lê ne hewceye, ez bawer dikim hemû xendevan jî dizanin ku DTP û PKK-ê heta niha bi sedan carî ev daxwaz anîne zimên.
Lê Salahaîtin Demîrtaş îro weke berpirsiyarekê dewletê dipeyive û sedîsed eksê tiştên heta nuha parastine dibêje.
Piştî daxuyaniyê Demîrtaş, ez ketim malpera DTP-ê û min bala xwe daprograma DTP-ê. Min xwet bizanibim hela ka di programê da li ser resmîbûn û perewerdeya bi zimanê kurdî çi dibêjin? Pir balkêş e, di programê da sedîsed eksê dîtinên Demîrtaş e, di gelek ciyên programê da bi rengekî pir vekirî doza resmîbûn û perewerdeya bi zimanê kurdî tê kirin.
Di beşekî programa DTP-ê da li ser perwerdeya bi zimanê kurdî wiha tê gotin:
”Hebûn kurdan û nasnameya wan ewê li gor dîtineke demokratîk û li gor prensîbên mafên mirovî were qebûlkirin.
Hebûna kurdan û nasnameya wan di her warî da ewê were naskirin û bi qanûna esasî were garantîkirin, ji bo mafên xwezayî guherandinên qanûnê ewê werin çêkirin. Mafê ziman û kulturê ewê bibin xwedî garantiyên qanûnî, radyo, telewîzyon û çapemenî ewê bi temamî azad bin. Radyo, TV-ya tirkî girêdayî çi qaîdeya huqûqî be, weşanên bi kurdî û yên zimanên din din jî ewê li gor wê prosedurê were meşandin. Ji bo faaliyetên kulturî jî ewê eynî prensîbên huqûqî bête meşandin.
Kurdî ewê weke zimanê perewerde û fêrbûnî were bikaranîn.(programa DTP-ê beşê, Meseleya kurd ewê li gor esasê aştî û demokratîk çareser bibe)”Wek tê dîtin di programa DTP-ê da tê gotin ku ”ewê hebûn û nasnameya kurdan were naskirin û ewê bi qanûnê were garantîkirin”, ”kurdî ewê bibe zimanê perwerde û fêrbûnê(bi tirkî gotine, kurtçe egîtîm ve ogretîm dîlî olarak kullanilacaktir), ”mafê zimên ewê bi qanûnan were parastin” û hwd.
Lê Salahattîn Demîrtaş bi wan gotinên xwe him parktîk û him jî programa DTP-ê înkar dike.
Û dibê meriv vê yekê bigre cidiyê û li ser rawest e.
Demîrtaş çawa dikane wiha bibêje?
Demîrtaş çawa dikane hemû tiştên heta nuha hatine kirin û gotin red bike û weke tirkekî kemalîst van dîtinên li dijî tevgera kurd ya netewî biparêze?
Û çima heta nuha berpirsiyarekî DTP-ê ev dîtinên wî tekzîb nekiriye?
Em dizanin ku nîvê parlamenterên DTP-ê kesên asîmîlebûne û ji hestên kurdayetiyê dûr ketine, mejiyê wan bi îdeolojiya kemalîzmê hetiye şuştin, di hest, dîtin û siyaseta xwe da ji kurdperweran bêtir fena berdevkên kemalîstan dipeyivin.
Salahattîn Demîrtaş yekî ji van kesan e. Piraniya kadir û parlamenterên DTP-ê yên kurdînezan li têla tirkan dixin, tirkperweriya wan tim ji kurdpereweriya wan xurttir e.
Kesên wiha dibê nebin berdevkên miletê kurd û tevgera netewî.
Kemalîzmê hestên wan yên kurdperweriyê kuştiye, kesên wiha bi dîtin û xebatên xwe ji karê bêtir, zirarê didin tevgera kurd.
Meriv fêm nake nûnerekî miletê kurd û parlamenterekî DTP- ê piştî 30 sal têkoşîn, piştî hewqas fedekarî, piştî bi hezaran şehîd û malwêranî hîn jî bêfedî û bêheya dibêje:
”Em weke Îraqê daxwaza du zimanên resmî nakin”Ê wê demê tu daxwaza çi jahr û zuqûmê dikî?
Heger kurd ewê hîn jî doza resmîbûna zimanê xwe nekin, wê dema ev şer ji bo çi ye?
Wê demê hewqas xwîn ji bo çi hate rijandin?
Wê demê ji bo çi hûn zarokên xelkê dişînin serê çiyan?
Ma qey hemû ji bo ku tu bibî parlamenter?
Gotinên Demîtaş skandal û rûreşiyeke mezin e, dibê DTP li hember van gotinên Demîrtaş bêdeng nemîne, xwe kerr neke û hesabê vê yekê jê bipirse.
Nexwe dibêjin "sikût ji îqrarê" ye...
Dibê hemû kurdên welatparêz û kurdperwer li hember van dîtinên Salahattîn Demîrtaş dengên xwe bilind bikin.

weke http://bianet.org/bianet/kategori/bianet/112836/dtpli-demirtas-kurtce-resmi-dil-olsun-diye-bir-talebimiz-yok