Tirs û mereza dilê wan Kurdistan çêdibe

Tirk bi qasî neyartiya kurdên Kurdistana Bakur dikin hewqasî jî neyarên kurdên başûr, rojava û rojhilat in jî.
Ji bo wan kurd kurd e, yên kîjan beşî dibe ferq nake.

Çimkî derdê wan li tu derê kurd azad nebin, Kurdistan çênebe. Bi qasî ku li dij in li Rojava Kurdistan çêbibe, hewqasî jî li dijî serxwebûna kurdên başûr in.
Dibê kurd viya bizanibin.

Ma we referanduma 2017´a ji bîr kir?

Ji bo wê jî dibê kurdên rojhilat, başûr û bakurê Kurdistanê bi hev ra alîkariya birayên xwe yên Rojavayê Kurdistanê bikin. Dijminê me gişan yek e.
Di nav kurdên Rojava da hin kesên zexel, qelp hene. Wek zîwan, xurêl û xurnûga di nav genim da hene, dibê werin bêjingkirin. Gerek ew nebin berdevkên kurdan. Îro roja siyasetmedarên jîr û jêhatî ye.

XXX

Gava kurdek, ya jî beledîyeke kurdan tabeleyekê şaş dinivîsîne, kesên zana şaşiyê rast bikin baş e, dibê meriv bike jî.

Lê dibê meriv henekê xwe bi xelkê neke.

Hin kes ji ber şaşiyeke rastnivîsê tinazên xwe bi Belediya Curnê Reş(Hîlwanê)dikin. Ev ne xweş e, dibê meriv wer neke.

XXX

Caran hin kes gotineke bi tirkî dinivîsin û dibêjin gelo meriv kane viya bi kurdî çawa bibêje?

Tirkî û kurdî du zimanên pir dûrî hev in. Lema jî dibê meriv li gorî tirkî nefikire.

Her navê bi tirkî normal e kane bi kurdî ne rast be, bi hawakî din be. Dibê em li gorî qaîdeyên zimanê xwe bifikirin. Îşê me bi tirkî tune ye.

Belediya Curnê Reş(Hîlwanê)bi tirkî navê aşxaneyekê kirine ”Çorba Evî”, dibe, normal e.

Lê em ne mecbûr in wek tirkî bibêjin ”Mala Şorbê”!

Meriv kane bibêje, ”Şorbexane”.

Wek em dibêjin, aşxane, qahwexane, çayxane, pastexane, dîwanxane û hwd.

XXX

Serokê Tirkiyê Erdogan dîsa gef li kurdan xwariya, gotiye ”heger terorîstên cudakar sîlehên xwe daneynin, ewê bi sîlehên xwe va werin binaxkirin.”

Ev mêrik bûye belayek mezin û ketiye pêsîra me, hal û karê wî gefxwarina li kurda ye.

Qesta wî helbet ne PKK tenê ye, mêrik dibêje PYD, HSD, QSD gişk PKK ne û terorîst in. Dibê teslîmî me bibin.

Heta topeke mezin li vê dewleta zalim, antî-kurd nekeve ne em tu carî rehet dikin, ne jî Ewrûpa û cîranên Tirkiyê.