Li gorî Yasîn Aktay pir şerm e meriv ji kurdan ra bibêje kurd

Cîgirê serokê AKPê Yasîn Aktayê ereb li Sêrtê gotiye, ”êdî pir şerm e meriv ji însanên vê herêmê ra bibêje kurd…”
Yasîn ereb dev ji erebiya xwe berdaye bûye tirk dixwaze kurd jî wek wî bibin tirk.
Lê esas ew tercumaniya fikrên Erdogan û Davutoglu dike. Çimkî Erdogan û Davutoglu jî dibêjin li Tirkiyê yek milet heye û ew jî miletê tirk e. Kurd, ereb, çerkez, boşnak, çeçen hemû bi hev ra miletê tirk in.
Yasînê ereb berdevkê Davutoglu ye, diyar e dema AKP careke din were ser hukum ewê nehêle ne kes ji kurdan ra bibêje kurd û ne jî kurd ji xwe ra bibêjin em kurd in. Ji ber ku efendî wa ye ji nuha da dibêje ji kurdan ra nebêjin kurd, şerm e…

XXX

Serokkomar, sultan û xwediyê dewleta tirk Erdogan, li Belçîkayê li ser zimên temî û şîret li tirkan kiriye, gotiye:
”Heger em zimanê xwe wenda bikin emê nikanibin li hêjayiyên xwe yên din jî xwedî derkevin. Li vir dibê em gelkî hesas bin. Zimanê xwe yê zikmakî ji bîr nekin. Dibê berê hûn tirkî fêrî zarokên xwebikin û dû ra zimanê welatê hûn lê dijîn…”
Hûn dibînin mêrik ji tirkên mahcir ra, ji tirkên ku ewê tu carî venegerin Tirkiyê ra dibêje, berê tirkî fêrî zarokên xwe bikin.
Yanî tirkekî li Almanya tê dinê, hemwelatiyê Almanyayê ye û di praktîkê da êdî alman e, dibê berî almanî tirkî fêr bibe.
Lê eynî Erdogan vê şîretê li kurdan nake, ji kurdan ra jî nabêje berê kurdî fêrî zarokên xwe bikin, dû ra tirkî.
Ji tirkan ra li Ewrûpayê dibêjie berê tirkî fêrî zarokên xwe bikin û li Tirkiyê jî nahêle kurd bi zimanê xwe perwerde bibin.

XXX

Yê hesabê wî paqij(temîz) be tirsa wî ji muhasebê tuneye.

XXX

Diristî, rastgoyî êdî bûye tûtya. ne tê ditin û ne jî mişteriyê wê heye. Lê keysperestî, pûlperestî, bêbextî di rewajê da ye, bazara wê heye û mişteriyê wê jî pir in.