Serokê Ergenekonê serokê artêşê ye

Çapemeniya tirk do ji îfadeya Mîralay Levent Goktaşê girtiyê doza Ergenekonê hin beş weşand.
Mîralay(albay)Levent Goktaş, di îfadeya xwe da di derbarê belgeyên li ba wî hatine girtin da dibêje, ”emir dan, min jî hazir kir.”
Mîralay Levent Goktaş tiştekî venaşêre, pir eşkere dibêje, ”belgeyên bi dizî yên di Klasora numreya 51-ê da hemû bi agahiya serokerkan û bi emrê Qumandarê Hêzên Taybet hatine amadekirin.”
Di operasyona Ergenekonê da li mal û yazîxaneya Mîralayê teqawit Levent Goktaş, DVD-yeke bi numreya 51-ê hate girtin.
Di vê dîsketa DVD-ê da di çarçeweya amadekariyên darbeyeke leşkerî da ji serokkomar Gul bigre heta bi serokwezîr Erdogan, bi hezaran însan li gor koka wan ya netewî, fikrên wan yê siyasî û baweriyên dînî hatine fîşkirin.
Goktaş di îfadeya xwe da dibêje, zanîn û belgeyên di DVD-ya 51-ê da xebat û amadekariyên Hêzên Taybet in. Li ser emir û daxwaza serokerkaniyê wan ev xebat kiriye.
Goktaş di derbarê belgeyan da wiha dibêje:
”Li ser daxwaza serokerkaniyê, tîma ku min wezîfedar kir li herêma Mêrsîn, Edene û Stenbolê bi Tîmên Tevgera Psîkolojîk ya serokerkaniyê ra hatin ba hev û ev xebat hazir kirin.”
”Di netîceya xebata 2-3 mehan da hemû agahiyên ku me bi dest xist, wek lîsteyekê me xist dîsketeke reş û min teslîmî qumandarê bi navê N.B kir. Wî jî ev dîsket bir da serokerkaniyê.”
Ji destpêka 2008-an da ye ev û gelek belge û wesîqeyên din di destê dadgehan û hukûmetê da ne.
Dadgeh jî û hukûmet jî bi delîl û îspat dizanin ku hemû amadeyiyên darbeya leşkerî bi emir û talîmatên serokerkanên wê demê û genaralên artêşê hatine kirin.
Di vî warî da tu kêmasî û dudilî tuneye, hertişt li ber çava ye.
Herkes dizane ku Goktaş û hin zabitên weke wî, bi serê xwe, bêyî emir û destûra amîrên xwe nikanin serokkomar, serokwezîr û bi hezaran kesên din fîş bikin û di heqê wan da dosyeyan amade bikin.
Helbet ne Goktaş tenê, nuha gelekên din jî eynî agahî dane dadgehê, gotine heyran çima hûn me digrin, ji me ra gotin û me jî emir bicî anî.
Yanî di doza Eregenekonê da mesele ne kêmasiya delîl û belgeyan e, bi delîl û îspat, hertişt li ber destê dozger û hakiman e.
Lê dîsa jî nikanin hemû sûcdarên esasî, yên ku emir dane Goktaş û yên weke wî bigrin û ceza bikin.
Ji ber ku sûcdar ne yek e, ne dudune, bi hezaran, bi dehhezaran e, hemû serokerkan û general di nava vî îşî da ne.
Bi hezaran burokrat, akademîsyen, dîplomat, nivîskar, alim, siyasetmedar û tucar di nava vî karî da ne.
Ewê kê bigrin kê negrin?
Gava bixwazin hemû sûcdaran ceza bikin, wê demê berî hertiştî divê artêşê belav bikin.
Çimkî pir hindik hemû serokerkan û genaral sûcdar in, wan emir daye zabitên di bin xwe ra û karên bêqanûnî bi wan dane kirine.
Li gor qanûna bingehî û qnûnên din cezayên piraniya wan muebet e. Çimkî xwestine bi darê zorê hukum bigrin destê xwe.
Bûyera Ergenekonê ji bo Tirkiyê bûye weke çîroka Hezar û Yek Şevê, camêran civatê pê mijûl dikin.
Netîce ewê çend kesên herî bêxwedî û bêpişt bi hin cezayên sembolîk ceza bikin û ser meselê bigrin.
Bêguman ev netîce ne ku hukûmet naxwaze sûcdaran ceza bike loma ewê wiha bibe, na, ji ber ku çete û qatil hewqas pirin ku girtin û cezakirina hemûyan îro gelkî zor e, hukûmet newêre vê rîskoyê bigre.
Di nava dokumanên ku di buroya Goktaş da hatiye girtin da belgeyeke bi sernivîsa ”Koka Etnîkî ya Kesên ku Tirkiyê Îdare dikin” jî heye.
Yanî kî ji kîjan miletî ye?
Di vê belgeyê da li hember navê serokkomar Abdullah Gul, serokwezîr Erdogan, Bulent Arinç, Abdulkadîr Aksû, Huseyîn Çelîk, Dengîr Mîr Mehnmet Firat û gelek wezîr û parlamenterên din ”kurd”, ”ermenî”, ”ereb”, ”neqşîbendî” û hin notên din nivîsîne.
Ji bo ku roja hewce be yeko yeko îfadeya wan bigrin…
Û ne tenê di heqê siyasetmedaran da, dosyeke bi vî rengî di derbarê mensûbên dadgeha bilind da jî amade kirine.
Di vê dosyeyê da jî her şexs li gora koka wî ya etnîkî û dîtinên siyasî yanî çep e, kurd e, bawerî pê tê, bawerî pê nayê, elewî ye, fetulahçî ye, muhafazekar e, terîqetçî ye, demokrat e, dîncî ye, hemşerîcîparêz e, nûrcî ye tasnîf kirine.
Helbet mêrikan leşker jî ji bîr nekirine. Dosyeyek jî li ser mensûbên artêşê ji hazir kirine.
Di vê belgeyê da jî ji bo hin zabitan hin îfadeyên wiha bikar anîne, gotine:
”Malbat bêhuzûr e, tim li xanima xwe dixe.
Ji Bakurê Îraqê şeşderban tîne û difroşe.
Merivekî bêexlaq e, herşev diçe bar û payyonan, bi jinên fahîşe ra radibe û rûdine.
Kasetên pornoyê difroşe personel.
Alkolîk e, komunîzmê diparêze.
Bi peran hebên Vîagra temîn dike.
Bêşeref e, pir bi îhtîras e, menfeetparêz e.
Ataîst e.
Dijminê dîn e.
Merivekî pir tahlûkeye, gotin di dev da nasekine, pênc pere nake.”
Erê hukûmet newêre bi xurtî biçe ser hemû sûcdaran, erê dadgeh nikanin hemû sûcdaran ceza bikin lê li gel vê jî çeteyên kemalîzmê û artêşê darbeyeke pir mezin xwarine, zû bi zû nikanin werin ser hişê xwe.
Û tiştê rê ber mesela kurd vekiriye jî ev pêşketin û bûyer in. Heger leşkeran ji hukûmeta AKP-yê ev sîle nexwara îro me nikanîbû qala ”çareseriye mesela kurd” bikira…