Dewleta tirk di şer da israr dike

Serekerkanê Artêşa Tirk Orgeneral Îlker Başbûg, di rojnameya Hurrîyetê da îro dîsa nîşan daye ku artêş, ewê dev ji şerê xwe yê li hember kurdan bernede û di vî warî da jî ne hukûmet û ne jî hêzeke din dikane daxwazeke wiha ji artêşê bike.
Başbûg, li dijî daxwaza hin derûdoran ya rawestandina şer jî derketiye û weke împaratorekî sedsala navîn gotiye:
”Li ser vê meselê bira kes aqil nede me. Ne disekinim, ne jî ji bo ku terorîst werin dipêm. Belovacî wê, ezê herim, lê bigerim, bibînim û îmha bikim. Dema em rastî grûbeke terorîst tên, dixwaze bira çalakî kiribe, ya jî nekiribe, teslîbbûna wan tê xwestin. Tim wiha bûye. Ji nuha û pêva jî ewê wiha dom bike.”Belê, mêrik pir vekirî dipeyive, dibêje bira tu kes daxwaza rawestandina şer ji me neke, heta em tevgera kurd ya netewî ji ortê ranekin em şer ranewestînin. Kî çi dibêje, bila bijêje, emê şerê xwe bidomînin.
Ji van gotinên Başbûg xuya dibe ku di mesela kurd da tu giraniyeke hukûmetê tuneye, artêş çi bibêje ew e.
Hin parlamenterên AKP-ê yên kurd gotibûn, di mesela kurd da ”di nabêna hukûmet, serokkomar û seroerkan da mutabaqat heye”, di rojên pêş da ji bo rawestandine şer hukûmetê hin gavên çareseriyê bavêje.
Yanî di vî warî da hêvî dabûn milet.
Lê li hember van gotinên Başbûg, tu maneya wan beyan û îdîayên parlamenterên AKP-ê yên kurd namîne.
Başbûg, di bersîvên xwe da nîşan dide ku hukûmet nikane ji wan daxwaza rawestandina şer bike.
Loma jî îdîayên ku hukûmet dixwaze di mesela kurd da hin gavan bavêje, bi riyeke aştî vê meselê çareser bike, li hewa dibîmîne.
Başbûg, pir vekirî dibêje, heta ku ew PKK-ê neqedînin, yanî heta ku tevgera kurd ya netewî neqedînin ewê dev ji şerê li hember kurdan bernedin.
Di van demên dawî da di serî da DTP û hin derûdorên din, di mesela kurda da qala fersendeke dîrokî dikin, dibêjin divê ev fersend ji dest neyê revandin.
Başbûg, li ser gotina ”fersenda dîrokî” jî rawestiyaye û gotiye:
”Kî fersenda dîrokî çawa dibîne ez nikanim tiştekî bibêbêjim. Lê em ji wê çi fêm dikin min ew eşkere got. Ji bo ku em nikanin terorê biqedînin divê em sebra xwe û ezma xwe ya micadelê wenda nekin. Wezîfeya artêşê ew e heta ku terorîst bi temamî ji ortê werin rakirin micadeleya xwe xwe bidomîne.”
Başbûg, li Emerîka di civîna xwe ya çapemeniyê da jî li ser mesela PKK-ê û Kurdistana başûr eynî tişt gotibû, gotibû ”heta em PKK-ê biqedînin emê şerê xwe bidpmîni.”
Başbug, him li Emerîka û him jî di vê hevpeyvîna xwe da li djî avêtina hin gavên demokratîk û dayina mafên kultirî derdikeve û dibêje:
”Bi girtina hin tedbîrên sosyal û kulturî terorîzm naqede, baweriya bi tiştekî wiha şaş e. Heta ku PKK were tasfiyekirin emê bi PKK-ê ra şer bikin.”Ji van gotinên Başbûg jixwe diyar e ku artêş xwe tenê xwediyê dewletê dibîne û hukûmetê bi tiştekî nahesibîne.
Lê li alî din hukûmet jî di esasê xwe da ne li dijî van gotinên Başbûg e.
Serokwezîr Erdogan, li ser daxwaza ”bira herdu alî jî çekan deynin” îro bersîveke eynî weke ya Başbûg daye û gotiye:
"Li vir aliyek heye. Aliyê ku divê çekan deyne rêxistina cudaxwaz a terorîst PKK ye.”Di nabêna van gotinên Erdogan û Başbûg da tu ferq tuneye, Erdogan jî weke Başbûg, qala ”bolîcîtiyê/cudaxwaziyê” yanî daxwazên kurdan yê netewî dike û li dijî wê derdikve.
Loma jî pir ne rast e ku meriv bibêje, di mesela kurd da di nabêna serokerkan û serokwezîr da dijayetî heye, heger hebe jî tiştên pir bêqîmet in.
Baş e dibê kurd çi bikin?
Berî hertiştî dibê kurd xwe bi hin xeyalên ne rast nexapînin û ne li hêviya hin gavên îro ne mimkûn bin.
Tiştê meriv ji gotinên Başbûg fêm dike, artêş û hêzên şerxwez hîn baş newestiyane, dixwazin demeke din jî xwe tecrûbe bikin.
Hêviya wan ew e ku kurd biwestin, bihelin, perçe bibin û dev ji têjoşîna xwe ya netewî berdin, bi qedera xwe werin serî û teslîmî dewleta tirk bibin.
Şer, yekalî nayê rawestandin, aliyê kurd çiqasî bixwaze jî nabe, dibê dewleta tirk jî were nuxteya agirbestê.
Heta ku tirk neyên wê nuxteyê, PKK û DTP çi bikin jî şer ranawest e, ji ber ku dewlet nasekine, dibê ezê "bigerim, bibînim û bikujim..."
Netîce dibê PKK jî xwe li gor vê şêla dewleta tirk hazir bike.
Wekî din çare tuneye.
Ji piran pir, ji hindikan hindik diçe...