Te xerabî rexne kir, pesnê başiyê jî bide

Hin kurd elimîne tim xelkê rexne bikin, tim qala kul û kêmasiyên xelkê bikin.

Ez ne li dijî rexnekirinê me, gava hewce be dibê meriv fikrê xwe bibêje. Gava hewce dibînim ez jî fikrê xwe, raya xwe dibêjim, rexne dikim.

Lê gava yekî, dezgehekê, partiyekê karekî baş kir, dibê meriv wiya jî bibêje û teqdîr bike. Heta ji min tê ez teqdîr dikim, pesnê wê xebata baş didim.

Yanî dibê meriv ji karê xerab ra bibêje xerab e, ji karê baş ra jî bibêje baş e.

Lê hin kes ne li gorî karê baş û xerab, li gorî dilxwaziyê, partîzaniyê hereket dikin. Heger ne ji taximê wî be, ne ji cimata wî be, kî çi karê baş bike jî naxwaze bi başî qalê bike, xwe jê ra kerr û lal dike. Ev ne pîşikekî baş e.
Meriv xerabî rexne kir, dibê meriv pesnê başiyê, rindiyê jî bide.

XXX

Dibêjin xiraba bibîne, rinda bi bîr bîne. Heta me hêzên îslamî li ser hukim nedîtibû me digot belkî faşîst û kemalîstên tirk yên herî xerab in.

Lê wek mesela rahme li gorra kefendiz, her kes dibêje xwezî bi dema kemalîst û leşkeran, îslamiyan sola kemalîstan di teqayê ra avêtine, sed qatî ji kemalîstan, ji leşkeran xerabtir in, bêexlaqtir in, zalimtir in.

XXX

Xwezî ne li şîretkiran, xwezî li şîrethilgiran. Hin canik û camêr fêrî şîretkirinê bûne, tim aqil didin xelkê. Lê ew bi xwe tu carî şîreteke kesî nakin serê xwe, aqilekî ji kesî nagirin.

Dibêjin belkî kûpê êqil in.

XXX

Zerika feqîr ji germa çire çira wê ye. Ez ji kêfa dilê xwe nakim baqîn. Pitepita min ji ber halê me yê perîşan e.

Lê dengê min naçe derekê.

Deng dikim tesîra dengê min tune ye, deng nekim dilê min rehet nake.