Me îro li Stockholmê, danê sibê sitranbêjê dildaran, hezkiriyên ber dilê kurdan Beytocan(Beytullah Gunerî) bi merasimeke layiqî wî, ew teslîmî axa sar kir.
Li Stockholê di vê demsalê da rojên wiha xweş, 10-11 derece
germ, bê sar û serma, bê baran kêm in. Rojeke tam li gorî dilê wî bû.
Di tabûta xwe da, di gorra xwe da li axaftinên nas û dostan, li sitrana hevalên
xwe yên sitranbêj gudarî kir, bi wan dilşa bû.
Ji ber ku hewqa pir xweş bû, nas, dost û hevalên wî ne qefilîn, şil û pil nebûn.
Rojeke tam li gorî pakiya dilê wî bû, bi wefata xwe, bi gorrkirina xwe zahmetî neda kesî, kes li ber baranê şil û pil nebû, her kesî di rojeke pir xweş da, di nav atmosferke sakîn da gul û çîçekên xwe danîn ser gorra wî û xatir jê xwest.
Gelek hunermend, nas, dost û hezkiriyên wî hatibûn merasima gorkirinê.
Hunermendên dostên wî, heyranên dengê wî, bi eşq û evîn, bi bi xemgînîyekemezin kilama wî ya bi navê ”Agir ketiye dilê min” li ser gora wî gotin û dûra jî gotin de bi xatirê te, gelek sipas ji bo van sitranên te li pey xwe ji me ra hîşt. Sitranên te nemir in, bi wan emê tim te bibîr bînin.
”Agir ketiye dilê min
Xew nakeve çavê min
Agir ketiye dilê min
Xew nakeve çavê min
Çima tu ji min dûr ketî
Bêje roniya çavê min
Çima tu ji min dûr ketî
Bêje roniya çavê min
Rinda min, gewra min
Çend sal e li hêviya te me
Wele çend sal e li benda te me
Rinda min, gewra min
Çend sal e li hêviya te me
Wele çend sal e li benda te me”
Inga kommentarer:
Skicka en kommentar