Hin ewlad xwelîser in

Pêşiyên me li ser ewladê pîs, ewladê bêkir teşbîhek pir xweş kirine, gotine:

-Ewlad heye serbiser e, ewlad heye gula li ser e, ewlad jî heye xwelîser e.

Gelek kurdên xwelîser ji dêlî ku bavên xwe derbas kin, ji miletê xwe ra karekî baş bikin, bûne heval û rêberên dijmin.

Yên pî û baskên kurdan şikandine, yên hêza dijmin li Kurdistanê qewî kirine ev kurdên xwelîser in.

Kurdên bûne heval û peyayên tirkan ji leşker û pûlisên dewletê xerabtir in. Bêyî piştgiriya wan dewletê nikanîbû ev zulm li me bikira.

 XXX

Kevir li kûz(li cer) keve jî wey li halê kûz, kûz li kevir keve jî dîsa wey li halê kûz.

Kîjan li kîjanî keve jî yê li zirarê, yê dişkê tim kûz e.

Qedera me kurdan û ya kûz pir dişibe hev.

Halê tirkan baş dibe jî em li zirarê ne, halê wan xerab dibe jî em li zirarê ne.

Çimkî em kûz in, ew kevir in.

Ji bo ku em neşkiyên dibê em bi kevir bin, ew jî bi kûz bin.

Lê ev îş ewê çawa bibe bi Xwedê ez jî nizanim.

Ji bo ku em bibin kevir û kûz bişkînin serokên me yên îro qet hêviyekê nadin min...

XXX

Vanpîrên tirk ên tahmijîne xwîna me li Silêmaniyê bi droneran dîsa çend kurd kuştine.

Ev vanpîr û zebanî ji kuştina me, ji xwîna me têr nabin.

Wek gurên har, wek vanpîrên devbixwîn wer li pey me ne, nahêlin em rojekê jî rehet bikin, ne dilbikul û şînî bin

Em kezebreşî kirin.