Çend rêz ji bîranînên min -41-

Weşandina hin not û nivîsên xwe yên kevn didomînim. Min got bira wenda nebin. Ew jî tarîxeke. Do ez çi bû me, çi fikirî me bira were zanîn.

XXX
1988-02-19
Komeleya Jinan li Stockholmê li Meydana Sergelstorgetê ji bo piştgiriya girtiyên zindana Diyarbekrê grewa rûniştinê çêkir. Radyoya Merheba xebera wê da. Tirk zû bi zû qala xebat û protestoyên kurdan nakin, lê vê carê kirin. Belkî bi bo xatirê jinan kirin.

Komela Stockholmê civîna xwe çêkir. Federasyon jî ji bo piştgiriya girtiyên zindana Diyarbekrê hin xebatan dike. Di civînê da di heqê xebatên xwe da em agahdar kirin.

XXX
1996-02-19

*Îşev şeva Eydiya Remezanê ye. Min telefonî diya xwe û mala birayê xwe Fûad kir. Bi diya xwe ra û bi pîreka Fûad Remzîyeyê ra peyivîm.
Fûad ne li malê bû. Esas min nizanîbû sibe Eydî ye. Ez îro li mala Elîşêr(Zîya Avci)pê hesiyam.
Mala Yildiz xanimê ava be, wê got. Sirgûnê em ne tenê ji welatê me, ji urf ûadetên me, ji kultura me jî dûr xistiye, me êdî eydî meydî ji bîr kiriye.

*Elî Çiftçî telefonî malê kiriye, li min pirsiye. Ez ne li mal bûm. Gelo kane ji bo çi be? Ezê telefon bikim, fêr bibim ji bo çi ye…

XXX
1997-02-19

Ev hefteyeke lawikê me Rojen nexweş e. Ew ne bes e ez jî nexweş im. Ez di xwe ra nabînim qelemê bigrim destê xwe. Li ciyê kar jî pir diwestim, kar pir e. Wek kurdên Binxetê dibêjin, heger ji min ra "biserifiya" minê xwe nexweş binivîsanda û mehekê bîna xwe bigirta, têr bifikiriyama...

 XXX

1999-02-19

Îro piştî kar çûm komela apociyan, me hinkî sohbet kir. Îro jî grûbekê avahiya Koma Miletan çend seetan îşxal kir, ji Serokê Koma Miletan Kofî Annan bi faksê soz girtin ku ewê sibe mesela Abdullah Ocalan bigrin rojeva xwe û li ser bipeyin.

Xwedêgiravî ewê zextê bidin ser Tirkiyê ji bo ku tadê li Abdullah Ocalan nekin û mahkima wî jî bi hawakî adil û vekirî were kirin.

Li her çar perçên Kurdistanê û li seranserê dinyayê meş û liberxwedan berdewam in, kurd baş li ber xwe didin. Bi taybetî jî ji Kurdistana Îranê xeberên baş tên, lê hemû bajarên Kurdistana Îranê kurd rabûne ser piyan. Li Lubnanê hewetinê. Li gelek bajarên Tirkiyê û li Kurdistanê milet bi mêranî li ber xwe dide û li gelek deran jî kuştî hene.

Îxaneta hikûmeta Yûnanîstanê jî hêdî hêdî eşkere dibe. Him beyanên merivê îstîxbarataYûnançstanê yê li Sefareta Kenyayê bi xwe û him jî ew kesên bi A. Ocalan ra bûne dibêjin çawa bi zor birine ew teslîmî Tirkan kirine.
Serokê Îstîxbarata Yûnanîstanê bi telefonê bi merivê xwe yê li wir ra peyivîye, gotiye bixapînin, dema nexapiya, bi zor derxin, dema ew jî nebû derman têkin xwarina wî. Ev axaftina di nabêna wan da di rojnameyeke Yûnanî da hatiye weşandin. Tirkan qala vê xeberê kirin.

Sibe seet di donzdan da meşeke tê çêkirin. Hêvî dikim bê teşxele derbas bibe.

 

XXX

2000-02-19

Dewlet van rojanan gelkî diçe ser HADEPê. Îro reyisê belediya Diyarbekrê û Sêrtê bi şiklekî terorîstwarî girtin û emrê girtina yê Bîngolê jî dana.
Îddîa wan ewe ku van kesan alîkariya PKkê kirine, ketine civînên wan yên li der û hundur û di warê ekonomîk da jî hin îmkanên belediyan xwedêgiravî pêşkeêşî PKKê kirine.
Helbet vana giştik derew û mahne ne. 

Sebebê esasî dixwazin di warê siyasî da wan teslîm bigrin û bikin mamûrê dewletê.
Çimkî van serokên belediyan di warê siyasî da nuha roleke gelkî mezin dilîzin, heyetên Ewrûpiyan yek li pê yekê diçin ba wan û ji bo çareserkirina mesala kurd bîr û raya wan digrin. Ev yek jî dewletê gelkî aciz dike. 

Lema jî bi metodên wisa dixwazin çavên wan bitirsînin.