Li Sûriyê çêbûna dewleteke kurd ewê çi zirarê bide Tirkiyê?

Tirkekî gotiye:
”Ji bo ku meraq dikim dipirsim. Li Sûriyê çêbûna dewleteke kurd zirara wê ji me ra çi ye?”

Erdogan, hukûmeta wî û hemû tirkên li dijî çêbûna Kurdistanê ne dibêjin, ”heger li Sûriyê dewleteke kurd ava bibe, ewê ji kurdên me ra bibe pişt û çavkaniyeke îlhamê.

Ji bo ku ji kurdên bakur(Tirkiyê)ra pişt çê nebe, dibê li tu derê kurd nebin xwedî dewlet, nebin xwedî îmkan.

Dibê kurd tim bindest bin, bêmecal û bêîmkan bin. 

Gava Tirkiye zulmê li kurdên xwe dike, gava wan dikuje, dibê kurdên din nikanibin alîkariya wan bikin.

Yanî ji bo ku kurdên bakur(Tirkiyê) tim û daîm bêpişt bin û rojekê nebin xwedî dewlet, dibê li Sûriyê kurd nebin xwedî maf, heta dibê li wê coxrafyayê kurd nemînin jî.

A Tirkiye ji bo vê êrîşî kurdan dike û dixwaze rojavayê Kurdistanê dagir bike.

Piraniya tirkan jî wek Erdogan difikirin û lema jî neyartiya kurdan dikin. 

Çimkî merivê tirk xwe ne wek şexsekî xwedî aqil û îrade, xwe wek leşkerekî artêşê dibîne. Leşker ne azad e, nikane bi serê xwe hereket bike, ew mecbûr e emrê serbazê xwe bîne cî, li gorî emrê tê dayin tev bigere.

Civata tirk ji miletekî bêtir dişibe artêşekê, serekerkan çi emrî bide wan ew rast e, wiya diparêzin.