Hin hevkarî nayên efûkirin

Gelek dereceyên hevkariya bi neyar ra hene. Erê her babetên hevkariyê pîs e, lê hin hevkarî hene pir pîs in û nayên efûkrin.
Mesele di zindanê da gava yekî girtî li hemberî hevalên xwe bibe hevakrê qerdiyanan hevkariyeke pir rezîl e û ebeden nayê efûkirin...
Dîsa gava ferdên miletekî wek kurdan bindest, bêyî ku mutaj û mecbûr bin dibin hevalên dewletê, hevalên partiyên tirk û li dijî gelê xwe piştgiriya dewletê û hukûmetê dikin jî dibê xweş nayê dîtin û neyê efûkirin.
Bi vê gotinê helbet ez nabêjim dibê meriv here li xelkê xe, şîdetê bi kar bîne. Na, qesta min ne ev e, dibê meriv vê hevkariyê bi tu hawî qebûl neke, mazûr nebîne, wek karekî pîs bibîne…

XXX
Bêtehamuliya alaya kurd
Neyarekî miletê kurd li ba Facebookê giliyê ala kurd kiriye. Kurdekî ala kurd kiriye profîla xwe. Neyarekî kurdan(bi îhtîmaleke mezin ewê tirk be)li ba Facebookê gilî kiriye, gotiye ev al me bêrûmet dike, heqaretê li me dike, me biçûk dixe. Lema jî em dixwazin ev al ji wê profîlê were rakirin.
Hûn dibînin xelk dixwazin di medya sosyal da jî em tunebin, dixwazin li wir jî em bindest bin, wek tirkan, ereban û farisan ne xwedî eynî mafan bin.
Bira alayên tirk, ereb û farisan hebin, lê bira ya kurdan tunebe. Yanî dibê li vê dinyayê kurd ne xwedî tu mafan bin. Hetta heger mimkûn be dibê kurd ji kok da werin qirkirin. Daxwaza piraniya tirkan ev e, dibê kurd tunebin!

Gelo mimkûn e kurdek giliyekî wiha bike? Weleh kurdê bibe hevalê dewletê û Erdogan giliyekî wiha jî bike zêde ne xerîb e. Kesê wê hevkariyê normal bibîne dikane wezîfeyeke wiha jî qebûl bike...