Ziyareteke gelkî girîng

Serokê Kurdistanê Mesûd Barzanî, bi serdaneke resmî îro çû Emerîkayê.
Serok Barzanî roja çarşemiyê li Qesra Spî ewê bi serokê Emerîkayê George Bush ra hevdîtineke resmî bike.
Li gor beyana wezareta derve ya Emerîkayê, hevdîtinên Barzanî yên resmî ewê roja sêçemiyê bi wezîra karê derve ya Amerîkayê Condoleezza Rice û hin berpirsiyarên din ra dest pê bike. Tê gotin ku alîkarê serokwezîrê Îraqê Berhem Salih jî di heyeta Barzanî da ye û ewê jî bi Barzanî ra beşdarî van hevdîtinan bibe.
Li gor beyanên berdevkên Qesra Spî, serokê Kurdistanê Mesûd Barzanî ewê li Washîngtonê bi şêwirmendên siyaseta derve yên namzetê domokratan Barack Obama û yên komariyan John McCain ra jî hin hevdîtinan bike.
Serokê Kurdistanê ewê du hefteyan li Emerîkayê bimîne û hilbijartinên serokatiyê jî li wir taqîb bike.
Çapemeniya tirk dinivîse, dibêje şêwirmendê Erdogan yê siyaseta derva Ahmet Davutoglu jî ewê bi serokê Kurdistanê Barzanî ra di eynî tarîxê da li Emerîkayê be. Lê nabêjin Davutoglu ewê bi kê ra hevdîtinan bike.
Diyar e di protokolê da tu hevdîtinên girîng tunene, heger hebûya tirkan ewê binivîsanda.
Lê ji dêlî wê balê dikşînin ser ziyareta serokê Kurdistanê û gotine, ”Barzanî ziyareteke krîtîk pêk tîne.”Tiştê meriv ji sernivîs û ji şiroveyên tirkan fêm dike, ew ji vê ziyareta serokê Kurdistanê ne kêfxweş in û heta gelkî jê aciz in. Heger ji destê wan bihata ewê rê li ber vê ziyareta serokê Kurdistanê bigirtana.
Berpirsiyarên hukûmeta Kurdistanê li ser armanc û sebebên ziyareta serok Barzanî heta nuha tiştek negotine. Lê ji ber ku ziyaret li ser vexwendina Qesra Spî ye bêguman gelkî girîng e û miheqeq sebebekî cidî heye. Ya na meriv di saniya dawî da dawet nake.
Loma jî meriv dikane bibêje ku ziyaret bi serê xwe ji bo kurdan serkeftineke mezin e. Lê heger bi vê ziyaretê kurd bikanibin bi emerîkiyan ra hin peymanan jî îmze bikin bêguman ewê gelkî baştir be.
Bi hêviya ku serokê Kurdistanê bi xeberên xêrê vegere û hemû kurdan şa bike.