Hukûmeta Malikî qîlê xwe nîşanî kurdan da

Hukûmeta Malikî di van hefteyên dawî da li hember kurdan şêla xwe tam sert kir û qîlên xwe baş nîşanî Hewlêrê da.

Divê ev şêla hukûmeta Bexdayê ya sert û Seddamwarî ji bo kurdan bibe alarm û li gor wê hesab û kitabê xwe bikin.

Ereban berê hin sebeb dîtin û li herêma Diyala, ji Qeretepeyê hêzên pêşmergan bi zor derxistin.

Hewlêrê zêde îtîrazî vê paşdavekişîna ji Qeretepeyê nekir û hêzên pêşmerge ji Diyalayê vekişand.

Piştî vê serkeftina li Qeretepeyê, rejîma Bexdayê xwest pêşmergeyan ji Xaneqînê jî derxe û bînayên ku merkezên YNK-ê û PDK-ê tê da ne ji wan bistînin. Kurdan li vir ev daxwaza ereban qebûl nekir û ji Xaneqînê venikişyan, bîna vala nekirin.

Di vî warî da tu nemabû ku di nabêna pêşmerge û artêşa Îraqê da şer derkeve. Lê di deqîqeya dawî da pêrgî li şer hate girtin.

Tiştê xuyaye her ku ereb di warê leşkerî da xwe topî ser hev dikin û xurt dibin dixwazin serkutî û çavsoriyê li kurdan bikin. Bûyerên li Diyala û li Xaneqînê rû dan îşareta vê meyla ereban da kurdan.

Di rojên pêş da, dema ereb(ez dibêjim ereb ji ber ku ferq nake, kîjan be jî ewê eynî tiştî bike)hinekî din jî xurt bibin û bizanibin ku di warê eskerî da ewê kanibin zora kurdan bibin, ewê zorê bikarbînin.

Ji xwe wa ye ji nuha da, li gel ku hewqasî ne xurt in, li gel ku serokerkan kurd e, serokkomar û cîgirekî wî kurd in, wezîrê derva kurd e û xwedêgiravî kurd şirîkê hukûmetê ne lê dîsa jî guh nadin kurdan û bi ya xwa dikin.

Serokê Kurdistanê Mesûd Barzanî, di hevpeyivîna xwe ya bi rojnameya Şarqul Ewsat ra ev nêta ereban veneşartiya û gotiye ku ereb guh nadin me.

Serokê Kurdistanê, di hevpeyvîna xwe da rexneyên pir tûj li hukumeta Bexdayê digre û wê wek hukumeteka peymannenas û totalîter û binav dike.

Serokê Kurdistanê dibêje, ”Em di serdana xwe ya Bexdayê ya vê dawiyê da gihîştin çend peymanên baş û me hin tedbîr û rêveçûn jî ji bo cîbicikîrna wan danîn. Lê piştî ku em vegeriyan Kurdistanê peyman hatin jibîrkirin.”
Serokê Kurdistanê vê şêla ereban ya nuh êdî venaşêre û pir vekirî dibêje:

”Herçend em şirîkê hukûmeta Iraqê bin jî tu rola me li Bexdayê nîne. Di meseleya ewlekariyê, aborî û eskerî da jî em şirîk in, lê di van waran da me teşîtek nîne. Rola hikûmeta herêmê li Baxdayê nîne û gumana me li ser vê şirîkatiya hikûmetê heye. Gumana me li ser vî bingehê hevpişk yê ku Iraqa nû li ser hatiye damezrandin heye.”

Ji van gotinên serokê Kurdistanê Mesûd Barzanî jî diyar dibe ku nabêna hukûmeta merkezî û ya herêma Kurdistanê pir xerab e.

Hukûmeta merkezî di warê ewlekarî, aborî û eskerî da qet hesabê kurdan nake û guh nade wan.

Bêguman ev îşaretke gelkî xerab û bi tahlûkeye. Û nîşan dide ku di rojên pêş da kurd ewê rûbirûyî gelek gelşên mezin bibin.

Di vê nuxteyê da rola Emerîka gelkî girîng e. Heger di meseleya bicîanîna madeya 140-î da Emerîka piştgiriyê bide kurdan, ereb nikanin tiştekî bikin. Lê ku Emerîka jî bi ereban ra be ya jî ”bêteref” bimîne rewş xerab e.

Şêla Emerîka ya heta nuha ne di lehê kurdan da ye, Emerîka û Englîstan zixtê didin ser kurdan ji bo ku tawîzê bidin ereban. Dema ev herdu dewlet jî vê siyaseta xwe bi lehê kurdan da neguherin ewê çi bibe?

Di rewşeke wiha da gelo kurd dikanin çi bikin?

Di vî warî da serolê Kurdistanê dibêje ew li bende civînên Parlamentoya Iraqa Federal in. Heger bi israr bixwzin ku madeyeka din têxin şûna maddeya 140-ê wê demê ewê jî di cî da daxwaza Encumena Wîlayeta Kerkukê qebûl bikin û bajarê Kerkûkê bi Kurdistanê va girê bidin.

Serokê Kurdistanê li ser rol û giraniya serokerkan Babekir Zêbarî jî dibêje:

”Di warê eskerî da haya serokerkan Babekir Zêbarî ji gelek tiştan çênabe, bê haya wî gelek tişt têne kirin. Bi wî naşêwirin û hebûna wî jî bûye şeklî...”

Serokê Kurdistanê li ser rol û giraniya Talabanî jî eynî tiştî dubare dike, dibêje.

“Bêguman serok Talabanî roleke mezin di warê siyasî de dilîze, weke şexis. Lê belê weke serokomarê Iraqê însiyatîva wî ne gelek e…”

Dema meriv van gotinên serokê Kurdistanê dixwîne bêguman meriv hinekî bêhêvî dibe, meriv fêm dike ku di rojên pêş da gelek kelem û astengî ewê derkevin hember miletê kurd û serokên wan.

Bi hêviya ku kurd ewê van zor û zahmetiyan jî bêyî qeza û bela derbas bikin.