Faşîst bi emir û destûra dewletê êrîşî kurdan dikin û avahiyên wan dişewitînin

Piştî êrîşa Qeyseriyê tirkan êrîşî ser avahiya HDPê kirine, avahî şewitandin e û ala MHPê bi pêşiya avahiya da kirine.
Nuha gava ez vê nivîsê dinivîsim miheqeq faşîst li gelek deran bi alîkariya polîsên dewletê êrîşî avahiyên HDPê dikin û dişewitînin. Belkî însanan jî bikujin.
Ev ne cara pêşî ye tirk wiha dikin, piştî her teqînê û kuştina leşker û polîsan, êrîşî ser avahiyên HDPê, mal û dikanên kurdan dikin, dişewitînin û talan dikin.
Tabî yê viya dike û dide kirin dewlet e. Lê bi polîs û leşkerên xwe nake, bi çeteyên xwe yên faşîst dide kirin.
Û dû ra jî dibêjin ”xelkê reaksiyon nîşan da” (!)
Ev çetecîtî û talankarî qerekterekî dewleta tirk e, ji roja dewleta tirk ava bûye, dewletê hêzên faşîst tim wek çeteyên dewletê yên siwîl, yên alîkar li hemberî gelên ne musilman û kurdan bi kar anîye.
Jê dêlî ku polîs û leşkerên xwe, gurûhên faşîstan rê dikin ser kurdan û pê kurdan terorîze dikin.
Ev yek li Meraşê, li Sêwasê û li gelek derên din jî kirin.
Êrîşên faşîstan hemû bi organîze û toleransa dewletê dibe, dewlet bi riya polîs û MITê çete û faşîstên xwe dixe hereketê.
Heger dewlet nexwaze ne mimkûn e orta rojê, li ber çavê her kesî li Qeyseriyê bi sedan çeta û faşîst herin têkevin avahiya HDP, bînayê talan bikin, bişewitînin û dû ra jî ala MHPê pê da kin.
Di êrîşa 11 Îlona 2001ê ya Emerîka da çar balafir revandin û bi kêmanî 3000 însan kuştin.
Lê emerîkiyan êrîşî yek erebî û musulmanî nekirin, kesî çipiska xwe jî bi erebekî û li misilmanekî nekir.
Di herdu êrîşên par(2015)yên 13 û 14ê mijdarê da terorîstên ereb û îslamî 130 kes li Parîsê kuştin.
Pişt ra êrîşek du êrîşên din jî kirin, di wan êrîşan da jî gelek kesên siwîl kuştin.
Lê fransizan êrîşî ereban û musilmanan nekirin, mal û avahiyên ereb û musilmanan neşewitandin.
Di êrîşa balafirxaneya Brukselê da 30 kes hatin kuştin û 300 kes birîndar bûn.
Lê belçîkiyan êrîşî ereb û musilmanan nekirin.
Deletê terorîst girtin û ceza kirin.
Li Almanya yê jî terorîstan çend teqîn kirin û gelek kes kuştin.
Lê heta nuha ne li Almanyayê û ne jî li tuwelatekî Ewrûpayê ji ber van teqînên terorîstên îslamî kesî êrîşî ereban û musilmanan nekiriye.
Heta kesî çipiska xwe bi malbatên terorîstan jî nekir.
Êrîşên ji teref”gel” (!) ve tenê li Tirkiyê dibe, tenê li Tirkiyê pêştî her êrîşeke PKKê, TAKê û kuştina polîs û leşkeran, tirk êrîşî kurdan dikin, mal û dikanên wan talan dikin û dişewitînin.
Ev ne êrîşên spontan in, hemû ji alî dewletê ve tên organîzekirin. Dewlet nexwaze, destûrê nede êrîşkaran, ne mimkûn e kes êrîşî kurdan bike.
Yên bikin jî ewê werin girtin û cezakirin.
Ê em dibînin dewletê heta nuha yek êrîşkar jî negirtiye û ceza nekiriye.
Ji ber ku êrîşkar çeteyên dewletê yên profesyonel in, gava hewce be dewlet wezîfê dide wan.
Tiştê îro li Qeyseriyê bûye êrîşa dewletê ye, dewletê bi çeteyên xwe avahiya HDPê da  talankirin û şewitandin