19 december 2016

A dibê kurd tim wiha bikin

Dibê li hemberî her heqaretê kurd nerazîbûna xwe wiha nîşan bidin...

Pênc(5)partiyên Kurdistana bakur bi beyaneke nivîskî gotinên şêwirmendê serokkomar Erdogan, Burhan Kuzuyê faşîst û neyarê kurdan protesto kirine.
Burhan Kuzu, du roj berê di twittereke xwe da gotibû ”dema li Stenbolê mesela Mûsilê dihat minaqaşekirin namerdan (alçaxan)serîhildana Şêx Seîd derxistin, yên îro jî eynî namerd in.”
Pênc partiyên kurd îro ev gotinên Kuzu protesto kirine û ji Erdogan jî xwesitine ew jî Kuzu şermezar bike.
Tiştê baş baş e, dibê meriv teqdîr bike.
Ji ber ku kurd li hemberî vê heqareta Burhan Kuzu bêdeng neman û tavilê reaksiyoneke baş nîşan dan, lema jî Kuzuyê faşîst twitta xwe xera kir…
Ev cara pêşî ye tirkek û him jî berdevkê Erdogan ji ber aciziya kurdan, gavê paş da davêje.
Dibê ev reaksiyona kurdan û partiyên siyasî ne mexsûsî vê carê be, li hemberî her heqareta li kurdan û mezinên kurdan dibe nerazîbûn û aciziya xwe nîşan bidin.
Gava tirk bibînin tiştê dikin ji wan ra namîne, ewê di gotinên xwe da bêtir sergiran û bi temkîn bin û hewqasî rehet û bêperwa ji kurdan ra xeberan nedin.
Di beyanê da tunebûna navê HAK-PARê bala min kişand. Ev ne cara pêşî ye HAK-PAR xwe tevî hevkarî û protestoyên wiha nake.
Diyar e HAK-PAR naxwaze nabêna xwe û hukûmetê xera bike. Lema jî xwe tevî tiştê kanibe hukûmetê aciz bike nake.
Qey hevalên HAK-PARê naxwazin bi partî û hêzên zêde li dijî hukûmetê ra werin dîtin.
Wê rojê di TRT6ê da min li Kemal Burkay guhdarî kir. Ez matmayî mam.
Fena ku di şerê Sûriyê da Tirkiye, rola Tirkiyê, plan û projeyên Tirkiyê qet tunebin.
Fena ku welatekî bi navê Tirkiyê li wê herêmê tunebe. Fena ku Tirkyê piştgirî ebeden nedabe Daîşê, Nusra yê û hêzên din yên îslamî.
Fena ku di derketina şerê Sûriyê da qet û qet rol û tesîra Tirkiyê tunebe, fena ku hemû serokên çete û hêzên îslamî ne li Tirkiyê bin û ji Tirkiyê alîkariyê ebeden nagrin…
Burkay bi yek gotinê jî Tirkiye rexne nekir, qala plan û projeyên Tirkiyê nekir.
 Hemû xerabî, fêsadî, tevliyevî ji Îranê, Rûsya, Emerîka û Suûdîyê ye. Li Sûriyê planên van dewlwtan hene.
Burkay bi yek gotinê jî qala neyartiya Tirkiyê bi kurdên Kurdistana rojava ra nekir.
PYD, PKK rexne kir, qala planên Emerîkayê, Rûsyayê û Îranê kir, lê Tirkiye ji bîr kir…
Lema jî normal e HAK-PAR xwe tevî protestoyên wiha neke, bi hêzên biçûk miçûk û zêde li dijî hukûmetê ra nekeve nava tiştên wiha…
Dibê hinekî giran be, bi her partiyê ra hol nebe…
 Her 5 partiyên Burhan Kuzu protesto kirine ev in:
Partiya Azadiya Kurdistanê (PAK), PDK-Bakur, Partiya Sosyalîsta Kurdistanê (PSK), Partiya Kurdistanî (PAKURD) û Hareketa Azadî.

XXX
Piştî salekê heyeta PDKê û Tevgera Goran îro li Silêmaniyê, li mala serokê Goranê Newşîrvan Mistefa civiyan.
Berî civîna bi Goranê ra heyeta PDKê bi YNKê ra civiya û serokê heyeta PDKê Fazil û Mîranî û en berpirsê polîtburoya YNKê Mele Bextiyar ra civîneke hevbeş ya çapemniyê kirin û herdu aliyan jî li ser çareserkirina gelşên nabêna herdu partiyan da mesajên hêvîdar dan.
Rewş hatiye nuxteya dibê Newşîrvan û Mistefa Mesûd Barzanî miheqeq li hev bikin. Bêyî lihevkirina van herdu serokan li başûr ne yekîtiya kurdan pêk tê û ne jî Kurdistan çê dibe. Halîhazir gelşa herî mezin di nabêna Mesûd Barzanî û Newşîrvan Mistefa da ye, gava ew li hev bikin, lihevkirina bi hêzên din r ahêsantir e.
Hêvî dikim ji civîna PDKê û Goranê jî xebereke xêrê were û kurd neyarên xwe bi xwe dilşa nekin.

Inga kommentarer: