Siyaset û îdeolojiyek çep îro ji bo me malwêranî ye

Tiştê îro ji me ra lazim e û dibê em tenê wê bidin pêş û wê biparêzin îdeolojî û siyaseteke netewî ye, kurd û Kurdistan e. Îdeolojî û siyaseteke çep jî bi qasî ya îslamî şaş e û ji bo me bi zirar e,malwêranî ye, di nava guran da me bi tenê dihêle.

Em miletekî bindest û mezlûm in, tu îşekî me bi marksîsmê û antî emperyalîstî û neyartiya Emerîka tuneye. Ev ne karê tevgereke netewî ye.

Ji bo me kurdan dijminatiya Rojava û Emerîka xerabiya herî mezin e.
Li alîkî di rojname û telewîzyonên xwe da tu yê ji Emerîka ra xeberan bidî, ji Tirkiyê bêtir neyartiya Emerîka bikî, li herêmê xwe wek hêza herî antî Emerîkan nîşan bidî û dû ra jî alîkariyê ji Emerîka û Rojhilat bixwazî, ev nabe. Dibê em xwe ji van van dîtinên antî Emerîkan û çepên tirk xelas bikin.

Em bi vê rebenî û bindestiya xwe nikanin qûna dinyayê rast, bikin, Emerîka û Rojhilat adil ji herêmê, ji Rojhilata Navîn derxin. Û derkevin jî ne li kara me ye, barê me sivik nake, Tirkiye, Sûriye, Îraq û Îran di rojekê da ewê me daqultînin.

Li gorî rewşa me ya îro ne ew, em muhtacî Emerîka û Rojhilat in. Bêyî piştgirî û mudaxeleya wan em nikanin zora van zaliman bibin.

Em îro wek kurd muhtacî piştgirî û alîkariyê ne, Emerîka dike, Rojhilat dike, Rûsya dike, kî dike bira bike,dibê em ne li dijî kesî bin û neyartiya kesî nekin.

Loma jî dibê em dev ji çepîtiya ku bêyî zirarê tu feydeyê nade me berdin û siyaseteke netewî bidin pêş. Ev yek li hundur jî tifaqa me rehettir û me xurttir dike.

XXX

Gelê Kobanê misilman e, çima ji herçar perçeyên dinyayê misilman kom bûne û dixwazin misilmanên Kobanê bikujin û Kobanê îşxal bikin?

Gava dîndarên dînekî li ser navê wî dînî mafê jiyanê nedin miletekî ji eynî dînî, serê wan jêkin û tecawizî namûsa wan bikin, dibê meriv wek însan, wek misilman, wek dîndar li ser vê yekê bifikire?

Bibêje ji bo çi ?
Sûcê me çi ye?
Me wek kurd çi bi van misilman û dîndarên ereb, tirk, somalî, bosnî, arnawit û çeçen kiriye?
Çima bi hezeke mezin dixwazin serê me jêkin?
Dibê hemû alim, bawermend û dîndarên kurd vê pirsê ji xwe û ji birayên xwe yên dîndar bikin?

2014-10-11