Hûn çi bikin jî Kurdistanê çê bibe

Her ku roja avabûna Kurdistana serbixwe nêz dibe hêzên Kurdistan îşxal kirine awirên xwe li me tûj dikin, gefan li me dixwin û dibêjin ”em qebûl nakin hûn Kurdistaneke serbixwe ava bikin, em qebûl nakin hûn bibin xwedî dewlet.”

Nuha jî Îran wek Tirkiyê dibêje, ew li dijî Kurdistaneke serbixwe ye. Ji xwe ne îro, ji berê û berda ye Îran li dijî avabûna Kurdistanê ye. Û ji bo ku Kurdistan çênbe wan gelek caran Kurdistan kirine gola xwînê, bi dehan serok û rêberên miletê kurd bi alçaxî kuştine. Yanî di vî warî da sicîla farisan ji ya tirkan pir û pir xerabtir e.Loma jî pir ne xerîb e ku ew jî li dijî Kurdisanê bin.

Çima li dij in?

Ji ber ku em kurd in.

Li gorî van hêzên îşxalkar ji tirkan ra, ji farisan ra, ji ereban ra dewlet heq e, tenê ji me kurdan ra ne heq e; heta qebhet e jî!

Lê dibê meriv ji van gefên wan zêde netirse, dema roja wê hat, dema Kurdistan çêbû ewê mecbûr qebûl bikin, wekî din tu rê tuneye. Wan berê hebûna me jî qebûl nedikrin, heta digotin kurd tunene. Lê dû ra qebûl kirin. Piştî demekê ewê fêrî Kurdistana serbixwe jî bibin, ewê wê jî qebûl bikin...

Hinek sebir...

XXX

Ez dikim nakim fêm nakim, însanek çawa dikane ji diya xwe bêtir ji diya xelkê û ji zimanê xwe bêtir ji zimanekî din hez bike?

Heger hez dike ne normal e, di şexsiyeta wî da, di hestên wî da, di fikrê wî da seqetiyeke heye.

Yê min bi xwe diya min li ber dilê min ji hemû diyan û zimanê min jî ji hemû zimanan şîrîntir e.

XXX

Bi minasebeta qetlîama Swêsê ya 2ê temûza 1993a ez 37 kesên ji alî canî û qatilên devbixwîn ve hatin şewitandin bi hurmet bi bîr tînim û qatilan û piştevanên wan rûresş û şeremezar dikim. 

Min ev kurtenivîsa jêr û helbest ji rûpela Kejê Bêmal girt û kir kurmancî.

”Rojekê du term anîn Bîngolê. Bîngol bi van kuştiyan hejiya. Herkes dice dîtinê. Ez jî çûm. Term dibrin morgê. Yek xort, simêla wî hîn xwî nedaye. Ya din keçek e. Yê xort kinçên wî lê ne, keçik şûttazî ye. Lê belê ruyê xort pelixîye, pozê wî tuneye, ji hêta wî jî destek goşt hatiye jêkirin, tiliyên wî bi murekeb e. Şopa (dewsa) tiliya wî girtine. Ji vê bûyerê gelkî muteesîr bûm. Û tabî min xwe da araqê. Dû ra min helbestek jî nivîsî…”

Metîn Altiok

“Metîn Altiok, di qetlîama Sêwasê da(2 temûz)ji mirinê giran birîndar xelas bû. Lê belê ji qomayê dernekt û di 9ê temûzê da li Anqerê di nexweşxaneyê da wefat kir.”

Wisa sipî, wisa sipî ye bedena wê
tu dibêjî belkî ji perçakî hevrîşim e
loma jî hewece nedîtiye ser xwe bigire
Şilftazî, narîn, li ser sedyeyê termê keçekê
deh tiliyên wê bi boyax in
murekeba istampayê tê geriya ye
Heger keçeke min sax be
keçeke min di morgê da ye nuha
///Metîn Altiok