17 november 2012


Ma îro li Amedê kurd şerê çekdarî dikin ku dewlet vê zulmê li gelê Amedê dike?
Kemal Burkay û hin kurdên wek wî, gav û saetê ji PKK-ê dixwazin ku dev ji şerê çekdarî berde, çekan deyne û tenê xebata legal û demokratîk bimeşîne.
Fermo, ma îro li Amedê kurdan şerê çekdarî kiriye ku dewlet vê zulmê li gelê Amedê dike?
Hemû bajar ji alî bi hezaran pûlis, bi sedan tank û panzêran ve hatiye îşxalkirin. Nahêlin kes ji malê xwe derkeve. Xelkê terorîze dikin, kê li ku derê digrin serkut dikin, cop dikin, bi xurûr şerefa kurdan dilizîn.
Ma kurdan çi ”bêqanûnî”, çi nelirêtî kiriye ku vê zulmê li wan dikin?
Ma meş, civîn, beyanên çapemeniyê, grewên birçîbûnê ne mafên demokratîk in, çima dewlet nahêle kurd hukûmetê protesto bikin?
Çima vê zulma li milet dikin?
De bira Kemal Burkay û hemû hewariyên ”aştî û demokrasiyê” ji Erdogan ra bibêjin, tu çima nahêlî kurd çalakiyên demokratîk bikin, mafên xwe yên demokratîk bikar bînin?
Mesele ne rê û wasiteye, daxwaz e; bi kîjan riyê dibe bila bibe, hukûmet qebûl nake ku kurd doza mafên xwe yên netewî bikin.
Kurd bi kîjan riyê û bi kîjan wasiteyê bikin jî hukûmetê biçe ser kurdan û kurdan terorîze bike, bigre, bavêje zindanan û bikuje…
Rastî ev e, hemû kurd dibê vê rastiyê bibînin û dev ji rexnekirina PKK-ê û BDP-ê berdin û berê xwe bidin hukûmetê û Erdogan rexne bikin, siyaseta wî ya nîjadperst û faşîst rexne bikin.

XXX
Rejima meleyên Îranê dîsa ferman bidardekirina 27 kurdên siyasî daye.
Ev, barbariyeke pir mezin e, qetlîameke li hemberî miletê kurd e. Dibê kurd li hemberî vê barbarî û hovîtiya rejîma Îranê bêdeng nemînin, di facebook û twittirê da protesto bikin…
Li ser vê biryara rejîma Îranê, parlementerê kurd yê endamê parlemena Iraqê Dr. Mehmûd Osman, li ser hesabê xwe yê facebooka gelê kurd hişyar kiriye û xwestiye ku kurd vê hovîtiya rejîma Îranê şermezar bikin.
Dr. Mehmûd Osman, peyameke wiha belav kiriye: "Rejîma Tehranê îro(17.11.2012) biryar girtiye ku 27 çalakvanên siyasî yên Kurd bi awayên cûda cûda îdam bike, bêyî dadgehkirineke vekirî û bê qanûnî..”
Mehmûd Osman, di peyama xwe de bang li civaka navnetewî jî dike ku dibê zextên xwe li ser rejîma Îranê zêdetir bikin, ji bo ku ev îdam neyên pêkanîn.

Inga kommentarer:

Skicka en kommentar

PARVE BIKE