Pêşiyên Kiliçdaroglu jî rêberiya dijmin kirine

Li ser gotnên Onûr Oymen, şêla CHP-ê û Baykal û çepikên Kemal Kiliçdaroglu ya ji axaftina Oymen ra heta nuha di vî quncikî da min çend caran nivîsî û bêxîretiya û bêşexsiyetiya Kiliçdaroglu raxist ber çavan.
Lê îro min nivîseke pir hêja ya Mûnzûr Çem xwend.
Mûnzûr Çem, di nivîsa xwe da hinekî jî li ser Kiliçdaroglu û malbata wî jî rawestiyaye û hin agahiyên heta nuha me nizanîbû daye.
Ez dixwazim bi kurtî qala van agahiyên Mûnzûr Çem bikim.
Mûnzûr Çem dibêje, Kiliçdaroglu esas merivekî zêde ne hêjaye ku meriv li ser raweste.
Ev tespîteke rast e û di ciyê xwe da.
Merivekî ku rojê tişekî bibêje ne hêja, ne xwediyê gotinên xwe be û bi rastî jî ne hêjaye ku meriv zêde serê xwe pê ra biêşîne.
Lê li gel vê jî ji bo ku însan vê yekê bizanibin meriv mecbûr dibe ku carnan li ser rawste.
Mûnzûr Çem dibêje, esas nirxandina şexsan li gor kirinên bav û kalên wan ne metodeke rast e.
Ji ber ku ji malbata meriv yekî, di wext û zemanekî da hin tişt kiriye ne meriv mezin dike û ne jî biçûk dixîne.
Ev yek ji bo Kiliçdaroglu jî derbas dibe.
Mûnzûr Çem dibêje:
“Lê dema îdareya partiya wî rabe li qetlîameke li hember gelê wî hatiye kirin xwedî derkeve û bixwaze îro jî wê bike numûne, wê demê mesele diguhere.
Weke her kesê ku li hember vê bûyerê bêdeng dimîne, li hember Kiliçdaroglu jî bibîranîna hin tiştan dibe mecbûrîyetek.”
Mûnzûr Çem dibêje, Kiliçdaroglu bi eslê xwe ji navçeya Nazmiyê ji gundê Bolciyê ye.
Ji malbata wî ra dibêjin, “Çê Cewelî, yanî malbata Cewelî.
Ji alî bavê da navê kalikê wî Ûsifê Ûsêne Cewelî bûye. Navê birayê kalikê wî jî, Qemerê Ûsênê Cewelî bûye û yekî ji meşhûrên hevkarên qetlîama salên 1937-1938-an e.
Qemerê Ûsênê, yanî birayê kalikê Kiliçdaroglu, di wan salan da li hember gelê xwe bi dewletê ra hevkarî kiriye û ji bo kuştina kurdan her babet alîkarî daye hêzên dewletê.
Birayê kailikê Kiliçdaroglu, di dema qetlîama Dêrsimê da rê îşanî leşkerên dewletê daye, û îxbarî kiriye.
Ji ber vê yekê jî Qemer, ji alî gelê Dêrsimê va weke şexsekî ku destê wî di xwîna gelek kesî geriyaya tê nas kirin.
Di nava van qurbanên Qemer da, gelek merivên wî jî hebûne.
Yanî ne tenê îxbariya pêşengên berxwedanê û eşîreke din, îxbariya merivên ji eşîra xwe jî kiriye, ji wan jî gelek kes dane kuştin.
Dîsa li gor agahiya Munzûr Çem, dewletê di destpêkê da paşnavê Karabûlût li malbatê kiriye, lê bavê Kiliçdaroglu qey ji bo ku şopê li ser xwe wenda bike, dûra ev paşnav guhertiye, kiriye Kiliçdaroglu.
Ji van agahiyên Mûzur Çem jî meriv fêr dibe ku ne Kiliçdaroglu tenê, malbata wî jî, bav û kalên wî jî ne paqij in, weke Kiliçdaroglu îro dike, wan jî rêberî û hevalbendiya dewletê kiriye û bûne sebebê qetilkirina gelek kesan.
Û Kilçdaroglu jî vê tore û pêşikê xerab yê bav û kalên xwe ya hevalberndî rêberiya ji neyar ra didomîne.
Wisa xuyaye ku ne tenê ewladê şêxan bê sir, çêlê maran bi jahrî nabin, neviyên xayinan jî dev ji pîşikên bav û kalên xwe bernadin...