12 december 2009

Heta ku serokên kurdan ev serok bin kurdê hîn gelkî pûş bikutin

Berî nuha bi demêkê serokê DTP-ê Ahmet Turk, di axaftineke xwe da gotibû, ”Hevalên me dibêjin, mayina di meclîseke yasax da tu maneyeke wê tuneye” û bi van gotinan jî îşareta vegera sîne-î milet dabû, yanî dema partiya wan were girtin ewê ji meclîsê îstîva bikin.
Heta ev jî lê zêde kiribû, gotibû, heger piştî girtina partiya wan hilbijartinên zû çêbibin jî ewê beşdar nebin
Lê Ahmet Turk, di axaftina xwe ya îro da hinekî dev guherandiye û negotiye emê îstîfa bikin, tenê gotiye, ”partiya wan ewê fiîlî xwe ji parlamentoya Tirkiyê vekêşe û ji îro pê da beşdarî karûbarên parlamentoyê nebin.”
Meriv ji van gotinên Turk jî wisa fêm dike ku ewê xwe ji parlamentoyê venekêşin.
Ji ber ku Ocalan, di hevdîtina xwe ya roja çarşemiyê da ji parêzerên xwe ra gotiye, DTP were girtin jî tişt nabe, ”ne dawiya dinyayê ye, dema were girtin bira micadeleya xwe dewam bikin”, bira bi ”demokratên tirk” ra partiyeke din ava bikin û riya xwe bidomînin.
Meriv ji axaftina Ahmet Turk jî fêm dike ku ”emrê” berdewamiyê hatiye dayin û ewê îtîatî vî emrî bikin.
Ji xwe waye ajansa Firat Newsê gotiye, herçiqas DTP-ê berê wiha gotibe jî lê ”derdorên demokratîk germ liv ê biryarê nanêrin”, xwedêgiravî van ”derûdoran” dibêjin bira mebûsên DTP-ê îstîfa nekin û ji nû ve gurûbê ava bikin. Van hêzan di rojên pêş da ewê bi bangekê dîtinên xwe bigihînin DTP-ê.
Dîsa di eynî xeberê da tê gotin ku Emîne Aynayê ji rojnamevanan ra gotiye ”roja duşemiyê ewê li Amedê bin û derbasî DTK-ê(Kongreya Civaka Demokratîk) bibin.
Bêyî ”DTK-ê, Partiya Aştî û Demokrasiyê(BDP)jî berê hatiye avakirin û ew jî hazir e, dikanin derbasî wê jî bibin.
Yanî bi kurtî, îstîfeya ji meclîsê li ser daxwaza Abdullah Ocalan ewê bi rast negere, tenê weke forteke Ahmet Turk bimîne.
Û Ocalan jî demeke din ewê PKK-ê û hin kurdan bi tiştekî din mijûl bike, di bin navekî din da wan bîne ba hev, bibe û bîne û serî him li hevalên xwe û him jî li miletê kurd bigerîne.
Û demeke din jî ewê wiha dom bike.
Mêrik ne hil dike, ne heram dike, partiyê jî, gerîla jî ne ji bo serxwebûna Kurdistanê û azadiya miletê kurd, ji wê bêtir ji bo azadiya xwe, bi xwe ve girê dide û ji bo xwe bikar tîne.
Û pir mixabin ku PKK jî vê rastiyê nabîne û tim li gor daxwaz û emrên wî hereket dike û loma jî em tim gavekê bi pêş da û heft gavan bi paş da davêjin û dikin nakin, nikanin xwe ji gerîneke Abdullah Ocalan xelas bikin.
Di biryara mahkemeya qanûna esasî da tiştê herî balkêş, qedexeya di heqê Ahmet Turk û Aysel Tuglukê da ye.
Her kes dizane ku Turk û Tugluk di nava DTP-ê da kesên herî bêzirar, herî nerm in, tu carî ne terefdarê şer û teşxeleyê ne.
Lê dadgehê her çi hîkmetî îlahî ye, siyaset li van herdu ”nermikan” qedexe kir, yeka weke Emîne Aynayê jî dest nedanê.
Ya din jî çima ne 4-5 ke, çima tenê 2 kes?
Vê biryara dadgehê serê min hinekî tevhev kir...
Diyar e di vê qedexekirinê da jî siyaset û hedefeke dewletê heye, dewlet siyasetê li Leyla Zanayê qedexe dike, lê belkî jî Emîne Aynayê ji bo serokatiya pêşerojî serbest dihêle.
Çimkî ji bo şer û teşxeleyên vala, ji bo tevliheviyê ji wan ra kesên ne ”kurdçî”, şerûd û pêlewanên derewçîn lazim in, kesên ku ji bin emerê Ocalan dernekevin lazim in, kesên ku kanibin bêtir bi kurdan bilîzin lazim in....

Inga kommentarer:

Skicka en kommentar

PARVE BIKE