Serokê Giştî yê Partiya Maf û Azadiyan(HAK-PAR-ê) Bayram Bozyel, do li Sotckholmê konferansek da.
Min di heqê Bozyel da gelek tiştên baş bihîstibû. Lê weke şexs ne min ew dîtibû û ne jî lê guhdarî kiribû.
Eva cara pêşî bû ku di civîneke wiha berfireh da fersend çêbû ku ez li Bayram Bozyel guhdarî bikim û di vê nabênê da li ser ningan be jî em hevûdu binasin û çend gotinan ji hev bikin.
Kurdîaxftina kurdên Swêd li welêt gelkî deng daye, çawa ku Diyarbekir bi zebeşên xwe yên mezin û belek di nava kurdan da deng daye û meşhûr e, kurdên Swêd jî bi kurdiya xwe deng vedane û meşhûr bûne.
Dema qala kurdên Swêd dibe, di serî da herkes qala axaftina wan ya bi kurdî, "pakî û delaliya" zimanê wan dike.
Vê dengvedana kurdiya kurdên Swêd, li ser kurdên welêt jî otorîte û bandoreke mezin hîştiye.
Esas rastî li Swêd jî di her warî da û di nava hemû kurdên bakur da ne li gor vî navî ye, lê reqlamê carê ciyê xwe girtiye…
Li Swêd hemû kurd bi kurdî dipeyivin û kurdiya wan wan ya herî paqij, herî rast û herî xweş e…
A ji ber vê bandorê û vî navê kurdên Swêd yê giran, gelek kurdên welêt li hember kurdên Swêd, di warê zimên da otomatîkman xwe mahcûb, şermezar, fedîkar û hinekî jî ”biçûk” dibînin.
Ev cara pêşî bû ku kurdekî ji Kurdistanê hatibû di konferansekê da ji ber ”nebaşiya kurdiyaya xwe” hustuyê xwe li hember kurdên Swêd xwar nedikir û bi psîkolojiyeke ji xwe bawer û rehet dest bi axaftinê dikir.
Piştî konferansê, di beşê pirsan da her kesî bi meth û pesnên paqijî û xweşikiya kurdiya Bozyel dest bi axaftina xwe kir.
Li hember kurdiya Bozyel têra xwe xweş û şîrîn herkes him şaş û him jî matmayî mabû.
Kurdekî welêt û di ser da jî Licî, çawa dikanîbû kurdiyeke hewqas delal bipeyive?
Kurdekî welêt, çawa dikanîbû hemû meseleyên siyasî hewqasî rehet û jixwebawer, bi kurdiyeke hewqas xweş, bêyî ku devê wî li ber hev keve û li gotinan bigere bianiya zîmên?
Vê kurdiya Bozyel û rehetiya wî ya axaftinê piraniya kurdên Swêd xistibû heyretê, loma jî herkesî halan di kurdiya wî hildida, digotin kurdiya te û ne tiştekî din…
Fena erebê çav li penêrê ter keve, herkesî di ser da can dabû, ji pesnan devê kesî nediket hev, berî her pirsê, fasiliye metha kurdiya wî bû.
Bi rastî jî kurdiya Bozyel pir û pir baş bû û di axaftina xwe da jî gelkî rehet bû, hakimê mijarê û zimên bû.
Lê ji xwe ya herî normal jî dibê ev bûya.
Serokê pariyekê dibê siyasetê û zimanê miletê xwe baş bizanibe.
Dema ji siyasetê tiştekî fêm neke û bi kurdî jî nizanibe wê demê çima dibe serokê partiyê û pêşengê tevgere kurd ya netewî?
Heger ewê ji min ji û ji kesên ji rêzê baştir ji siyasetê fêm neke, zimanê xwe jî bi qasî min nizanibe bira nebe serok û here ji xwe ra karekî din bike.
Ma we cara dîtiye, ji ber ku siyasetmedarekî swêdî ya jî tirk baş bi zimanê xwe dizane însan rabin ji ber vê yekê pesnê wan bidin?
Siyasetmedar û serokê partiyeke tirk helbet ewê bi tirkî baş bizanibe, helbet ewê xweş bipeyive, li gor însanên din, helbet ewê bêtir jîr, zana û bi kultur be, haya wî helbet ewê bêtir ji siyaseta dinyayê, Tirkiyê û ya kurdan hebe.
Ji ber ku siyaset karî wî ye û ew jî bi zimên dibe.
Ji ber ku siyasetmeddarekî tirk bi tirkiyeke rast dipeyive tirk ranabin ji ber vê yekê pesnê wî nadin û nabêjin:
-Her bijî, ji ber ku tu bi tirkî dizanî?
Ji ber ku em kurd ji tiştê herî normal mehrûm in, loma jî dema em rastî serokekî kurdîzan tên, em ji kêfan difirin, em har û dîn dibin.
Weke siyasetmedar û serokên her miletî, dibê siyasetmedar û serokên kurdan jî zimanê xwe baş bizanibin.
Ji ber ku siyaset bi zimên dibe, bi îşaretan, bi zimanê kerr û lalan nebe.
Dema siyasetmedar û serokên me bi kurdî nizanibin, dibê em normal nebînin, qebûl nekin û lê guhdarî jî nekin.
Serokekî kurd çima ewê bi kurdî nizanibe?
Dema nizane bira nebe serok, bira yê zane bibe.
Esas milet jî ne tu milet e, ew jî weke siyasetmedar û serokên xwe ji rê derketiye û tê hesabê milet jî.
Gava milet li siyasetmedar û serokê kurdînezan guhdarî neke, kitêb, rojname û kovara wî nekire, neçe civîna wî, dema ciyê wê hat rexne bike, a wê demê bazara wî ya tirkî namîne û ewê ya kurdî fêr bibe ya jî dev jê berde, kesên dizanin ewê werin dewsê.
Di sektora xizmet da bi qasî yên xizmetê pêşkêş dikin, daxwaz û standartên yên xizmetê digrin jî gelkî mihîm e.
Aşxaneya serwîseke baş nake meriv careke din naçe wê aşxanê û tewsiyeyî tu hevalê xwe jî nake.
Ji bo ku ew aşxane topê navêje ya ewê qalîteya xwarin û serwîsa xwe bilind bike ya jî ewê dawiya dawî topê bavêje û nifteyê li deriyê aşxaneya xwe xe.
Siyaset jî wihaye, dibê milet ji siyasetmedarên xwe qalîteyeke bilind bixwaze, dibê zimanê kurdî şert bibîne, dibê serok xatibekî baş be.
Çawa ku meriv otoboza xwe teslîmî mawînekî nuh nake, her wisa dibê meriv serokatiya partiyekê jî teslîmî merivekî nezan, tifil û kurdînezan neke...
Di civîna Bayram Bozyel da du afîşên amblema partiyê yên bi tirkî(Hak ve Ozgurlukler Partisi) li panoya pişt masê xistibûn.
Partiya Maf û Azadiyan(HAK-PAR), partiyeke kurdan e, serokê wê kurd e û di civîneke ji sedîsedê wê kurd da qala siyaseta partiya xwe dike.
Di civînê da ne tenê kurdên Tirkiyê, kurdên Îraqê, Sûriyê, û Îranê jî hene, lê afîşê nav û amblema partiyê bi tirkî ye.
Em ferz bikin ku di civîneke partiyeke kurdên Sûrî da plaket û bandrol ne bi kurdî lê bi erebî bin, gelo em kurdên tirkiyê emê çi bibêjin û çi reaksiyonê nîşan bidin?
Di orta civînê da min çû ev rexneya xwe ji berpirsiyarê li kêlek Bozyel rûniştibû ra got, min got çima we teksteke bi kurdî jî bi darda nekiriye?
Birader got qey tuneyebûye, ya jî bîr nebirine...
Lê pir girîng nedît…
Halbû ev pir girîng bû, ya naormal dibê me, milet ew nav û amblema tirkî tenê qebûl nekira, ya kurdî jî bixwesta, heger tunebûya bira ew jî rakirana.
Lê kesî midaxele nekir û midaxeleya min jî ji “tirsa gazinan” bi dizî bû.
Ji ber ku dilê min rehet nekir, loma jî ez vê rexneya xwe jî li vir eşkere dibêjim û hêvî dikim ku ji nuha û pêva milet jî tiştên wiha êdî qebûl neke.
Netîce dibê ez bibêjim ku kêfa min ji serokê Partiya Maf û Azadiyan Bayram Bozyel ra hat.
Ez, di kar û xebatên wî yên ji bo kurd û Kurdistanê da jê ra serkeftinê dixwazim û hêvî dikim ku vê kurdiya xwe ya ku li Stockholmê olan da bike zimanê partiya xwe jî û di civînên xwe da jî bi kurdî bipeyive...
Inga kommentarer:
Skicka en kommentar